КъБР-м и цIыхубэ усакIуэ, СССР-ми РСФСР-ми я къэрал саугъэтхэм, Лениным и цIэр зезыхьэ саугъэтым я лауреат, балъкъэр литературэм и классик Кулиев Къайсын дунейм щехыжа махуэм ирихьэлIэу, гъэ къэси хуэдэу, Налшык къалэм усакIуэм и фэеплъу абы и цIэр зезыхьэ уэрамым тетым деж щызэхуэсахэм яхэтт КъБР-м и Парламентымрэ Правительствэмрэ, КъБР-м и ТхакIуэхэм я зэгухьэныгъэм и правленэм, республикэм и район администрацэхэм, жылагъуэ зэгухьэныгъэхэм я лIыкIуэхэр, усакIуэм и благъэхэр, Iыхьлыхэр, ныбжьэгъухэр, лъэпкъ интеллигенцэр, и усэхэр фIыуэ зылъагъухэр. УсакIуэшхуэр дунейм зэрехыжрэ мы гъэм илъэс 41-рэ ирокъу.
Зэхыхьэр яублащ Кулиев Къайсын и усэхэм ныбжьыщIэхэр адыгэбзэкIэ, балъкъэрыбзэкIэ, урысыбзэкIэ къеджэу.
КъБР-м щэнхабзэмкIэ и министр Къумахуэ Мухьэдин зэхуэсахэм фIэхъус гуапэ яриха нэужь, усакIуэм и псалъэ цIэрыIуэхэмкIэ - «Псэухэм - мамырыгъэрэ гуфIэгъуэрэ!» - пэкIур къызэIуихащ.
КъБР-м и Парламентым и УнафэщIым и къуэдзэ Жанатаев Салим къыщыпсалъэм къыхигъэщащ усакIуэ нэсхэр зэращымыгъупщэр, цIыхухэм я дежкIэ ахэр зэрыуахътыншэр.
- Гъэ къэси, Кулиев Къайсын къыщалъхуа, дунейм щехыжа махуэхэм ирихьэлIэу и фэеплъым деж дыщызэхуос, щIэблэр и усэхэм къоджэ, цIыхухэм зэIэпах и псалъэ Iущхэр ягу къагъэкIыж. А псор и щыхьэтщ усакIуэр зэрытщIыгъум. Мыбдежи усакIуэр щалъхуа Шэджэм щIыналъэми абы и усэхэм къыщеджэ, и гъащIэмрэ лэжьыгъэхэмрэ зигу къэзыгъэкIыж, и унэ-музейм екIуалIэ ныбжьыщIэхэм фIыщIэ яхуэфащэщ. Кулиевым и уэсятхэр зэрагъэзащIэр ди нэгу щIокI! – жиIащ Жанатаевым.
УФ-м и ТхакIуэхэм я зэгухьэныгъэм хэт, жылагъуэ лэжьакIуэ, тхылъ тедзапIэм и унафэщI Котляровэ Марие и псалъэм къыхигъэщащ Кулиев Къайсын и Iэдакъэ къыщIэкIахэр щIэблэхэм зэрызэIэпахыр, дэтхэнэ зы цIыхум дежкIи зэрыгурыIуэгъуафIэм, балигъхэми ныбжьыщIэхэми ахэр ягу зэрыдыхьэм къыхэкIыу. Котляровэ Марие ягу къигъэкIыжащ иджыпсту Москва щекIуэкI тхылъ гъэлъэгъуэныгъэм Кулиев Къайсын и цIэр зэрыщыIур.
КъБР-м и Парламентым ЩэнхабзэмкIэ, граждан жылагъуэм зегъэужьынымрэ хъыбарегъащIэ IуэхухэмкIэ и комитетым и унафэщI Текуев Амурбий жиIащ усакIуэм и Iэдакъэ къыщIэкIахэм ноби щIэупщIэ зэраIэр, нэгъуэщIыбзэхэмкIэ зэрызэрадзэкIыр, абы къигъэна тхыгъэхэр лIэщIыгъуэкIэрэ щIэблэм гъуазэ зэрахуэхъунур.
КъБР-м и ТхакIуэхэм я зэгухьэныгъэм и унафэщIым и къуэдзэ, радиожурналист, зэдзэкIакIуэ Мэремкъул Ларисэ жиIащ Кулиевым и щIэинхэм мыхьэнэшхуэ зэраIэр, нобэр къыздэсым зримыхьэлIа и усэ къыппэщIэхуэ зэрыхъур, абы и зэфIэкIыр литературэм епха цIыхухэм зэрагъэщIагъуэр, а тхыгъэхэм сыт щыгъуи гулъытэ хуащIын зэрыхуейр.
Кулиев Къайсын теухуа и гукъэкIыжхэмкIэ зэхуэсахэм захуигъэзащ Шэджэм щIыналъэ администрацэм и Iэтащхьэ Уэдыжь Хьэсанш. Абы жиIащ Къайсын щыцIыкIум къызэрицIыхуар, а цIыху Iущыр, акъылыфIэр Шэджэм щыпсэу и къуэшхэм я деж ар щIэх-щIэхыурэ кIуэуэ зэрыщытар, Шэджэм районым ЩэнхабзэмкIэ и унэм ар къыщыщыпсалъэкIэ яфIэгъэщIэгъуэну едаIуэу, упщIэ куэд ирату къызэрекIуэкIар. Абы щIигъужащ усакIуэм и благъэхэмрэ Iыхьлыхэмрэ я гъусэу, абы и фэеплъу спорт зэхьэзэхуэ 30-м щIигъу къызэрызэрагъэпэщар, зэманыр кIуэтэхукIэ усакIуэм и IэдакъэщIэкIхэм щIэупщIэхэм къазэрыхэхъуэр.
Къэпсэлъахэм жаIащ усакIуэшхуэр Къэбэрдей-Балъкъэрым щыпсэухэм зэращымыгъупщэр, литературэм, щэнхабзэм я лэжьакIуэхэм я дежкIэ усакIуэр щапхъэу къызэрынэжыр. ЛIэщIыгъуэкIэрэ цIыхухэм зэIэпахыну абы и усэхэр, и псалъэхэр къахуэщхьэпэнущ цIыхухэм лъагъуныгъэрэ гугъэрэ яIэу гугъуехьхэр къызэранэкIынымкIэ. Кулиев Къайсын и усэ I00 бжыгъэхэмрэ и тхылъ пщIы бжыгъэхэмрэ бзэ зэмылэIужьыгъуэу I40-кIэ зэрадзэкIащ икIи къэрал куэдым къыщыдагъэкIащ. И псалъэхэр зыщIэлъ уэрэдхэр ягъэзэщIащ СССР-м и уэрэджыIакIуэ цIэрыIуэ куэдым.
Кулиевхэ я лъэпкъым къыбгъэдэкIыу къэпсэлъащ Маликрэ Мустэфиррэ. Абыхэм пэкIум щызэхуэсахэм фIыщIэ хуащIащ, Къайсын и щIэинхэм пщIэрэ лъагъуныгъэмрэ зэрыхуаIэм папщIэ.
Къызэхуэсахэр усакIуэм и фэеплъым удз гъагъахэр тралъхьащ. Зэхыхьэм щыпащащ усакIуэр къыщалъхуа Шэджэм щIыналъэм, абы и фэеплъ унэ-музейм. Абдежи усакIуэм и гъащIэмрэ и гуащIэмрэ щытепсэлъыхьащ, и усэхэм къыщеджащ.
