Мэлгъэбэгрэ Мэздэгурэ щахъумэм...

115-нэ шу дивизэм и цIэр зезыхьэ Налшык лъыхъуа­кIуэ гупым хэтхэм Курп Ипщэ яхъумэу иIэ щIыпIэ хэхам (КъБР-м ЩIыуэпс хъугъуэфIыгъуэхэмрэ экологиемкIэ и министерствэм епхащ) и лэжьакIуэхэр я ­гъусэу, иджыблагъэ къуажэм и ипщэ-къуэкIыпIэ ­гъунэмкIэ хуэзэу зауэлIищым я къупщхьэлъапщхьэхэр къыща­гъуэтыжащ. 

Ар къызэрагъэпэщат «Фэеплъым и вахтэ - 2022 гъэ» Iуэхугъуэшхуэр екIуэкIыным и пэ къихуэу. Гупым я унафэщIу щыта Заруцкий Олег зэрыжиIамкIэ, къыщIатIыкIыжа ­къупщхьэлъапщхьэхэр зейхэр хэкIуэдауэ щытащ 1942 гъэм Мэздэгурэ Мэлгъэбэгрэ яхъумэу екIуэкIа зэхэуэм.
- Къэдгъуэтыжа хьэпшыпхэм яхэлъ тутынылъэм тетхам тепщIыхьмэ, зауэлIхэм ящыщ зым Осипов унэцIэр иIэнкIэ хъунущ икIи ар 59-нэ ОСБР-м хэтагъэнущ. Урысей Федерацэм ЗыхъумэжыныгъэмкIэ и министерствэм и архивым а унэцIэр яIэу дзэ гупым хэта цIыхуищым я цIэ къыщыгъэлъэгъуащ зы зэманым ирихьэлIэу хъыбарыншэу кIуэдауэ. Абы ипкъ иткIэ лэжьыгъэшхуэ икIи жэуаплыныгъэ зыпылъ къытпэщылъу къызолъытэ, щыуагъэ щымыIэу Iуэхур зэхэгъэкIын хуейщи, - къыхигъэщащ Заруцкэм.
ЛъыхъуакIуэхэм къагъуэтыжа къупщхьэлъапщхьэ­хэмрэ къауэ пкъыгъуэхэмрэ Iэрагъэхьащ Урысейм и ОМВД-м СледствэмкIэ и комитетым Тэрч районым щиIэ къудамэм. 
Апхуэдэуи къыхагъэщащ зауэм хэкIуэда лIыхъужьхэр пщIэ яIэу зэрыщIалъхьэжынур, Тэрч муниципальнэ районым и щIыпIэ администрацэр къыдэIэпыкъуу.