Я сабиигъуэр зауэм хиубыдат

Фашистхэм НэщIэпыджэхэ я унэ-лъапсэр зэрапхъуауэ щыпсэурт, зыхуейр ящIэу, зыхуейр яшхыу. Зэгуэрым Муса и къуэ нэхъыжь Ибрэхьим и адэм и шыр фашистхэм къафIидыгъужыну иужь ихьащ. Жэщыбгым шэщым щIыхьэри, шыр къыщIихуащ, абы шэсри пщIантIэм щыдихум, зы нэмыцэр кIэлъыуэри, и тхьэкIумэм техуауэ щытащ. Абы щхьэкIэ къэмыувыIэу Ибрэхьим шыр Шэрэдж псыжьым зэприхури, Псыгуэнсу дэс я благъэм, Мызхэ щигъэпщкIуауэ щытыгъащ. 

НэщIэпыджэ Ибрэхьим зауэ нэужьым, щIэныгъэ нэхъыщхьэ зригъэгъуэтащ, КъБКъУ-м филологиемкIэ и факультетыр къиухащ. КъБАССР-м щэнхабзэмкIэ и министерствэм, лекционнэ бюром, итIанэ ВЛКСМ-м и обкомым я инструктору лэжьащ, 1957 гъэм КъБКъУ-м и ВЛКСМ-м и комитетым и секретару хахащ. Сабийхэм я зэчийм зыщрагъэужь унэм и унафэщIу лэжьащ ар, I965 гъэм «Общество – Знание»  Къэбэрдей-Балъкъэр зэгухьэныгъэм и референтуи щытащ. ИужькIэ и гъащIэ псор журналистикэм триухуащ. Ар КъБАССР-м и Къэрал телерадиом и урыс къудамэм и редактор нэхъыщхьэу щытащ, хъыбарегъащIэ IэнатIэ зэмылIэужьыгъуэхэм щылэжьащ. Республикэм щыцIэрыIуэу, пщIэ къыщыхуащIу щытащ Ибрэхьим. Абы къыхуагъэфэщащ   «За освоение целинных земель», «К 80-летию Союза журналистов», «Ветеран труда» медалхэр, КъБР-м и Совет Нэхъыщхьэм и Президиумым и щIыхь тхылъыр.  1972 гъэм щегъэжьауэ  УФ-м и Журанлистхэм я союзым  хэтащ, 1995 гъэм «КъБР-м щIыхь зиIэ и журналист» цIэ лъапIэр къыфIащащ,  СССР-м  и Къэрал телерадиом и унафэкIэ, КъБАССР-р илъэс 60 щрикъум ирихьэлIэу фIыщIэ тхылъ къыхуагъэфэщащ, «Отличник телевидения и радио» дамыгъэр къратащ.

Муса и къуэ нэхъыщIэ НэщIэпыджэ Мухьэмэд илъэситху хъуа къудейуэ арат, фашистхэр я пщIантIэ къыщыдэтIысхьам. Зэгуэрым Iэнэм теIэбэри, зы кIэнфет къищтат абы. Ар зылъэгъуа нэмыцэ лIым Мухьэмэд и жьэм кIэнфет жьэдэз ищIри, и IэгушхуэхэмкIэ зэтрикъузауэ щытащ и пэри щиубыдыкIри. АпхуэдизкIэ сабий нэкIур икъузати, итхьэлэну хьэзырт. ЩIалэ цIыкIур джэлащ, ар зи нэгу щIэкI анэр фашистым и Iэр Iуихыжыху пэплъэри, щIым щIылъ сабийр къипхъуатэри къыщIэжащ унэм.

«Сэ си гъащIэ псокIэ сшхыну кIэнфетыр сшхащ абы щыгъуэм», - игу къигъэкIыжт Мухьэмэд, кIэнфет хуашия нэужь. А псалъэхэм къахэщыр кIэнфет фIыуэ зэримылъагъуратэкъым, атIэ фашистхэм яхуиIэ лъагъумыхъуныгъэрт. А дакъикъэхэм абы и нэгум иплъагъуэрт гукIэ игъэва къомыр. Абы щыгъуэм сабиигур хагъэщIами, ТекIуэныгъэ Иным иригушхуэрт Мухьэмэди. Абы хуэдэхэм зауэм яIиха адэхэм щхьэкIэ я гур мэуз, итIани абы я гъащIэм къыпызыщэ къуэхэр зэраIэм егъэгушхуэ. ТекIуэнгъэм иригуфIэрт ахэр, нэпсыр я нэм щIэзу. Арагъэнщ зауэм и бынкIэ щIеджэри.

Мухьэмэд дзэм къулыкъу щыщищIэ лъэхъэнэм Совет Армэм и телеграфист IэщIагъэр зригъэгъуэтащ. ИужькIэ Сталинград механик IэщIагъэм щыхуеджащ икIи ехъулIэныгъэхэр иIэу къиухащ. И студентыгъуэ илъэсхэм ныбжьэгъу куэд зэригъэгъуэтат, иужькIэ куэдри яхуэтхащ абыхэм. Мишкэ, Михаил цIэхэр тедзауэ письмохэр къыхуэкIуэрт абы.

Мухьэмэд цIыху гупцIанэт, гуапэт, щIэныгъэ зыбгъэдэлът, художественнэ, тхыдэ литературэхэм дихьэхт. И гъащIэ псом IэнатIэ пэрытащ, Лэжьыгъэм и ветеран хъуащ. И псэемыблэж лэжьыгъэм папщIэ «Ударник Коммунистического труда» (1964 гъэ), «За доблестный  труд»   (1970 гъэ),  «Победитель Социалистического Соревнования в 1973 г. и в 1977 г.» медалхэр къыхуагъэфэщащ, щIыхь тхылъ куэди къратащ.

Мухьэмдрэ абы и къуэш нэхъыжь Ибрэхьимрэ я адэмрэ адэ къуэшитIымрэ зауэм хэкIуэдащ, езыхэри фашистхэм яIэщIэкIуэдэным зы мащIэщ иIэжар. Езыхэри я насыпу къела щхьэкIэ, я гум дыркъуэу телъащ я адэр зэрыхэкIуэдар. ЗэкъуэшитIри дунейм ехыжащ я адэр здыщIэлъ щIыпIэр ямыщIэу, и кхъащхьэр ямылъэгъуауэ.

 

НэщIэпыджэ Замирэщ.
Поделиться: