Я лэжьыгъэр йофIакIуэ

Лышх узыфэхэм щеIэзэ республикэ диспансерым и мылъку-техникэ зэфIэкIыр иужьрей илъэсищым хэпщIыкIыу ирагъэфIэкIуащ. «Узыншагъэр хъумэн» лъэпкъ проектым хыхьэу сом мелуан 500-м щIигъу и уасэ Iэмэпсымэ зэхуэмыдэхэр къащэхуащ. Абы трагъэкIуэда мылъкур федеральнэ бюджетым къыхэкIащ.
IуэхущIапIэм и лэжьакIуэхэм зэрыжаIэмкIэ, икъукIэ зыхуэныкъуэу къаIэрыхьащ сом мелуан 91,2-рэ зи уасэ эндоскопие Iэмэпсымэр. Пкъыгъуэ зыбжанэу зэхэт оборудованэм Iэмал къарет узыфэ зэмылIэужьыгъуэхэр тэмэму къэхута хъунымкIэ, апхуэдэуи ныбэм хиубыдэ органхэр нэхъ тыншу операцэ щIынымкIэ.
IэмэпсымэщIэм и фIыгъэкIэ щыуагъэншэу къахутэфынущ шхын зыгъэткIу органхэм, тхьэмбыл къуэпсым, гъутхьэпскIуапIэм, гинекологием епха узыфэхэр. КъищынэмыщIауэ, узыр здынэсар, Iэпкълъэпкъым иIэ бэгыгъэр зыхуэдэр зэманышхуэ трамыгъэкIуадэу зэхагъэкIыфынущ.
Иджырей Iэмэпсымэм дохутырхэм я лэжьыгъэр къазэрыщигъэпсынщIэм къищынэмыщIауэ, нэгъуэщI зы фIагъи хэлъщ: сымаджэхэми эндоскопие къэпщытэныгъэр нэхъ къатемыхьэлъэу ирагъэкIуэкI хъуащ.
Лышх узыфэхэм щеIэзэ диспансерым 2021 гъэм къриубыдэу лапароскопие операциеу 300, медицинэ къэхутэныгъэу 2000-м щIигъу щрагъэкIуэкIащ.