Зихуэдэ щымыIэ IэщIагъэщIэ

УФ-м и Къэрал Думэм Промышленностымрэ сату хуэIухуэщIэхэмкIэ и комитетым и КъэпщытакIуэ гупым иджыблагъэ иригъэкIуэкIа зэIущIэм хэтащ КъБКъУ-м щIэныгъэ-къэхутэныгъэ лэжьыгъэмкIэ и проректор Хьэшыр Светланэ.

Комитетым и унафэщI, техникэ щIэныгъэхэмкIэ доктор Гутенев Владимир иригъэкIуэкIа зэхуэсыр теухуат технологие ехьэжьахэр къыщагъэсэбэп промышленнэ IэнатIэхэм зезыгъэужь къэхутэныгъэхэр ирагъэкIуэкIынымкIэ къэралым и еджапIэ нэхъыщхьэхэм щIэгъэкъуэн зэрахуэхъун хуей Iэмалхэмрэ хэкIыпIэхэмрэ. «Урысейм и машинэщIхэм я зэгухьэныгъэм» я жэрдэмкIэ къызэрагъэпэща зэIущIэм и лэжьыгъэм хэтащ къэралым и хабзэубзыху IэнатIэм и къулыкъущIапIэхэм я лэжьакIуэхэр, промышленностым епха IуэхущIапIэхэм я унафэщIхэр, еджапIэ нэхъыщхьэхэмрэ щIэныгъэ-къэхутакIуэ центрхэмрэ я лIыкIуэхэр, жылагъуэ лэжьакIуэхэр, къэпщытакIуэхэр.

Профессор Хьэшыр Светланэ псалъэ щратым зэхуэсым хэтхэм яригъэлъэгъуащ КъБКъУ-м къыщыщIагъэкI Iэмэпсымэхэмрэ хьэпшыпхэмрэ, абыхэм жыпхъэ яхуэхъу къэхутэныгъэхэм я гугъу ищIащ, пкъыгъуэбэу зэхэлъ полимерхэр технологие лъагэ къэзыгъэсэбэп зы IэнатIи щызэрамыхьэнкIэ Iэмал зэримыIэри къыхигъэщащ.

«КъБКъУ-м иIэщ химие тоннаж мащIэм хуэщIа иджырей полимер Iэмэпсымэхэмрэ хьэпшыпхэмрэ къызэрыщIэбгъэкI хъуну технологие зэмылIэужьыгъуэхэр. Зи гугъу тщIы технологиехэр и лъабжьэу къыщIэдгъэкI полимерхэр пхыдгъэкIын икIи промышленностым шэщIауэ къыщагъэсэбэпу хъун папщIэ ди университетыр «ТулаТЕХ» щIэныгъэ-егъэджэныгъэ центрым иригъэкIуэкI лэжьыгъэм хыхьащ. НэгъуэщIу жыпIэмэ, КъБКъУ-м и къэхутэныгъэхэр, и технологиещIэхэр «Пкъыгъуэбэ губгъуэ» зи фIэщыгъэ щIэныгъэ-технологие центрым и программэм хэту промышленнэ IэнатIэм хэтпщэнущ.

КъБКъУ-м къыхилъхьэ Iуэхугъуэм зихуэдэ щымыIэ IэщIагъэщIэхэр къыдоунэху. Ахэр хуэунэтIауэ щытынущ сыт хуэдэ химие пкъыгъуэхэр зэрызэхэт и лъэныкъуэкIэ зэпкърыхауэ къэхутэным, абыхэм Iэмэпсымэ икIи хьэпшып зэхуэмыдэхэр къыхэщIыкIыным. КъБКъУ-м мыхьэнэшхуэ щрат «Лэжьыпхъэхэр – 2030» къэрал программэм ипкъ иткIэ зызрагъэужьын хуей, пкъыгъуэбэу зэхэлъ технологиехэм епха проектхэм. Iэмэпсымэхэмрэ хьэпшыпхэмрэ къыщIэгъэкIыным къищынэмыщIа, абыхэм хохьэ зэрылэжьэну техникэр зэгъэпэщынри, IэщIагъэлIхэр гъэхьэзырынри.

Апхуэдэу къыхэгъэщын хуейщ ди университетыр пкъыгъуэбэу зэхэлъ технологиехэмрэ полимер зэмылIэужьыгъуэхэр къыщIэгъэкIыным елэжьыну инженерхэр егъэджэным, IэнатIэм пэрыгъэувэным гулъытэшхуэ зэрыхуищIыр. Абы хуэунэтIауэ Бытырбыху къалэм дэт, Пётр Езанэм и цIэр зезыхьэ къэрал политехникэ университетым зэгурыIуэныгъэ етщIылIащ, щIэныгъэ гуэдзэ зэрызрагъэгъуэт егъэджэныгъэ программэхэр зэгъусэу зэхэтлъхьащ», – яжриIащ КъэпщытакIуэ гупым хэтхэм Хьэшыр Светланэ.

ГурыIуэгъуэщ еджапIэ нэхъыщхьэхэм ирагъэкIуэкI щIэныгъэ-егъэджэныгъэ лэжьыгъэм къэрал къулыкъущIапIэхэм къыхуащI гулъытэм хэхъуэу зэрыхуежьар, зызыхъуэж дунейм пэджэж, къэхутэныгъэу ирагъэкIуэкIыр жылагъуэ-экономикэ зыужьыныгъэм телажьэ зэрыхъуным и Iэмалхэм лъыхъуэу зэрыщIадзар. КъБКъУ-м и къарур а зэхъуэкIыныгъэхэм пэлъэщыну къызэригъэгугъэри къызэрымыкIуэу гуапэщ.