Москва щыщIэдзауэ Брест нэс

ЦIыхубэ хозяйствэмрэ къэрал къулыкъумкIэ Урысей академием Кавказ Ищхъэрэм щиIэ къудамэм и студент Мэремщауэ Хъызыр «Непокорённые» дунейпсо проектым хэтынухэм ящыщщ. А Iуэхум хагъэхьащ къэрал 14-м (Беларусием, Къыргъызстаным, Абхъазым, Таджикистаным, Узбекистаным, Тыркуменистаным, Приднестровьем, Молдовэм, Луганск, Донецк цIыхубэ республикэхэм, Венгрием, Сербием, Китайм) щыщ щIалэгъуалэ жыджэри 100. Ахэр Москва щыщIэдзауэ Брест нэс кIуэнущ, къалэ щIыхьыцIэ зыфIаща къалэ-лIыхъужь 11-р къызэщIиубыдэу. 
«Непокорённые» дунейпсо проектыр егъэзащIэ Ломоносовым и цIэр зезыхьэ Дунейпсо клубым, Президент грантхэмкIэ фондыр, Лъэпкъ IуэхухэмкIэ федеральнэ агентствэр, Урысей МИД-р, УФ-м Егъэджэныгъэмрэ щIэныгъэмкIэ и министерствэр и дэIэпыкъуэгъуу. 
Москва икIыу Брест нэс кIуэнухэр ирагъэдэIуэнущ дунейм къыщекIуэкI политикэ Iуэхугъуэхэм теухуа лекцэхэм. Урысеймрэ СНГ-м хыхьэ къэралхэмрэ я щIалэгъуалэр зэрагъэцIыхуным, Хэку зауэшхуэм щыгъуэ ТекIуэныгъэ Иныр лъэпкъ куэдым къызэрызэдахьар я тегъэщIапIэу ахэр зэдэлэжьэфу, зэгурыIуэфу егъэсэным хуэгъэзащ мы псор. 
- Тхыдэ фэеплъхэр хъумэным теухуа проект щхьэпэм ди щIыналъэм и лIыкIуэу сыхэтыну си насып къызэрихьар гуапэщ, - жеIэ Мэремщауэ Хъызыр. - Хэку лъагъуныгъэкIэ псыхьа щIалэгъуалэ зиIэ къэралым пщэдей утемышыныхьми хъунущ.
Iуэхум хэтыну щIалэгъуалэм я щIыналъэхэм ягъэзэжмэ, зыIэрагъэхьа щIэныгъэмрэ тхыдэ фэеплъхэр хъумэным теухуа щIэуэ къащIамрэ щIагъэдэIужынущ еджапIэ курытхэмрэ нэхъыщхьэхэмрэ щIэсхэр.