ГъэшхэкI ерыскъыхэр узыншагъэмкIэ сэбэпышхуэу зэрыщытым и хъыбар дэтхэнэ зыми и сабиигъуэм щегъэжьауэ зэхихащ. Шэджагъуэ нэужьхэм и деж шху зэгъэпцIагъащIэ зы стэкан уефэныр сыт и уасэ – ерыскъыр гъэткIунымкIи, фэр дахэу щытынымкIи, Iэпкълъэпкъыр узыфэхэм пэщIэтынымкIи ар икъукIэ сэбэпщ. АрщхьэкIэ, иджыпсту куэдрэ зэхыдох гъэшхэкI лIэужьыгъуэ куэдым къэуат ящIэмылъу жаIэу. Ар къызыхэкIыр тыкуэным щIэлъ а ерыскъыгъуэхэм бифидобактериекIэ зэджэр зэрыхэмылъырщ.
ЦIыхум и Iэпкълъэпкъыр тэмэму лэжьэнымкIэ бифидобактерием хуэныкъуэщ. Медицинэ псалъалъэм зэритымкIэ, бифидобактериер – ар узыфэ зэрыцIалэхэм япэщIэту цIыхум и кIэтIийр хэщIапIэ зыхуэхъу микроорганизмщ. Бифидобактериер пхуримыкъумэ, уи кIэтIийр тэмэму лэжьэнукъым: ерыскъыр тэмэму пхуэмыгъэткIуу хъумэ, цIыхум и Iэпкълъэпкъым и дежкIэ мыхьэнэшхуэ зиIэ витаминхэр къыIэрымыхьэмэ, абы узыфэ зэхуэмыдэ куэд къигъэхъеинущ.
Бифидобактериехэр куэдрэ щылъкъым – я щхьэр гъэбыдауэ щIыIалъэм мазитI нэхърэ нэхъыбэкIэ щыпхуэхъумэнукъым. Абы къыхэкIыу ахэр тыкуэнхэм щащэнкIэ хъунукъым. Иджыпсту тыкуэнхэм щIэлъыр къызэрыгуэкI шхухэмрэ йогуртхэмрэщ. Пэжщ, абыхэми кIэтIийм ерыскъыр игъэткIуэнымкIи сэбэпынагъ гуэрхэр ягъэзащIэ. Ауэ ар зи фIыщIэр бифидобактериехэракъым, атIэ нэгъуэщI ерыскъыгъуэхэми (псалъэм папщIэ, къэбыстэ фIэIум, анэ быдзышэм) куэду узыщрихьэлIэ лактобактериехэрщ.
Бифидобактериехэм хуэдэу лактобактериехэми я зэхэлъыкIэм мымащIэу ущрохьэлIэ пробиотикхэм. Пробиотикхэр – микроорганизмщ, ирагъэкIуэкIа щIэныгъэ къэхутэныгъэхэм къызэрагъэлъагъуэмкIэ, ди узыншагъэмкIэ абыхэми сэбэпынагъэшхуэ яIэнущ. Псалъэм папщIэ, Iэпкълъэпкъыр узыфэхэм пэщIэтынымкIэ, цIыхум и дежкIэ зэраныгъэшхуэ зиIэ бактериехэр кIэтIийм къыщызэтемыувыIэнымкIэ, фэр дахэу щытынымкIэ, псантхуэ узыфэхэр къэмыгъэхъеинымкIэ.
Лактобактерием и препаратхэр лъатэ, кIэтIий узыфэхэр гъэхъужынымкIи жыджэру къагъэсэбэп, апхуэдэу къахутащ лъыдэуей зиIэхэм я дежкIэ абы иIэ щхьэпагъыр.
Тыкуэнхэм щIэлъ йогуртхэм цIыху Iэпкълъэпкъым дежкIэ сэбэпынагъ лъэпкъ зимыIэ, ерыскъым IэфIагъ, мэ дахэ къезыгъащтэ вещество куэд халъхьэ. Абы къыхэкIыуи, ахэр щIэх-щIэхыурэ уи шхыныгъуэм хыумыгъэхьэмэ нэхъыфIщ.
