Ди республикэм и мэкъумэш IуэхущIапIэхэм япэ хэгъуэр зэхаублащ.
Къэбэрдей-Балъкъэрым Мэкъумэш хозяйствэмкIэ и министерствэм хъыбар къызэрыдигъэщIамкIэ, мы гъэм бжьыхьэсэ гуэдзу гектар мин 50,5-м нэс, хьэпцIийуэ гектар мини 10 кърахьэлIэжынущ.
Мы зэманым ирихьэлIэу гуэдзыр гектар 500-м къыщахыжащ, зы гектарым хуэзэу центнер 43-рэ къытрах. ХьэпцIийуэ Iуахыжар гектар 400-м щIегъу - центнер 38-рэ.
- Iуэхур зэраублам хуэдэу екIуэкIмэ, 2022 гъэм Къэбэрдей - Балъкъэрыр гъавэ бэвкIэ гугъэ хъунущ, - жиIащ КъБР-м мэкъумэш хозяйствэмкIэ и министр Сыжажэ Хьэсэн. - МэкъумэшыщIэхэр жылапхъэфIхэмкIэ бэлэрыгъакъым, гъатхэ пасэм щыщIэдзауэ хьэсапкъэхэм щIыгъэпшэрхэмкIэ елэжьащ. Къапщтэмэ, гъэ кIуам ди республикэм гъавэу тонн 1 мелуаным щIигъу къыщрахьэлIэжащ. Мы гъэми а бжыгъэм хагъахъуэ мыхъумэ, нэхъ мащIэ мыхъуну мэгугъэхэр.
Иджыпсту и гуащIэгъуэу хьэпцIийр щыIуахыж Май, Прохладнэ, Бахъсэн щIыналъэхэм.
Бахъсэн районым мэкъумэш хозяйствэмкIэ и управленэм хъыбар къызэрыдигъэщIамкIэ, гектар 720-м щIигъур къахыжыну хунэсащ. Зы гектарым хуэзэу центнер 40 къытрах. Бжьыхьэсэ гуэдзу кърахьэлIар гектари 170-м нос, гектар къэс къытрах центнер 45-м нэхърэ мынэхъ мащIэ.
Тафэтесхэм къакIэлъыкIуэу хэгъуэм пэрыхьэнущ дунейр нэхъ щыщIыIэтыIэ бгылъэ щIыпIэхэм я мэкъумэш IуэхущIапIэхэр: Шэрэдж, Iуащхьэмахуэ, Дзэлыкъуэ районхэм.
ГъавэгъэкIхэм зэрыжаIэмкIэ, губгъуэ лэжьыгъэхэр и пIалъэм зэрырагъэкIуэкIам и мызакъуэу, дунейм и щытыкIэри гъавэмкIэ зэрыфIар сэбэпышхуэ къахуэхъуащ.
IэщIагъэлIхэм къыхагъэщ, иджыпсту хуэдэу хуабэу екIуэкIмэ, нэхъ зыхуэсакъын хуейр псыр фIыуэ зылъагъу нартыхумрэ сэхуранымрэщ. Абы папщIэ псы щIэгъэлъэдапIэхэр щыIэщ, Iуэхум пэмылъэщ къахэкIын хуейкъым.