КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ зэхуэмыдэхэм щыхэплъа зэIущIэ.
Къэбэрдей-Балъкъэрым и къэрал мылъкур уней щIынымкIэ 2023 гъэм и программэм тепсэлъыхьащ КъБР-м щIы, мылъку зэхущытыкIэхэмкIэ и министр Тэхъу Аслъэн. КъБР-м и Правительствэмрэ Федеральнэ казначействэм и IуэхущIапIэу КъБР-м щыIэмрэ нэхъапэу мылъку зытегъэкIуэдапхъэхэм теухуауэ я зэгурыIуэныгъэр къигъэлъэгъуащ КъБР-м финансхэмкIэ и министрым и къалэнхэр зыгъэзащIэ Къалэбэч Азэмэт.
- Проектыр дгъэбелджылащ Урысей Федерацэм ФинансхэмкIэ и министерствэмрэ КъБР-м и Iэтащхьэмрэ къэрал мылъкум и социально-экономикэ щытыкIэм теухуа я зэгурыIуэныгъэм тету. А зэгурыIуэныгъэм тещIыхьауэщ республикэм и бюджетым къэралым къыхудыщIигъур къызэрыратынур. Абы къигъэув Iуэхугъуэхэм ящыщщ Федеральнэ казначействэмрэ КъБР-м и Правительствэмрэ я зэгурыIуэныгъэ къэдгъэлъагъуэр. Нэхъапэу мылъку зытегъэкIуэдапхъэхэм теухуа Iэмалым дыхуокIуэ бюджет автономнэ IуэхущIапIэхэм ящыщхэм щIыхуэ къатехуэ хъужыкъуэмэ, - жиIащ Къалэбэчым.
«КъБР-м и транспорт системэм зегъэужьын» къэрал программэм, республикэм и автомобиль гъуэгухэм къахэгъэхъуэным теухуауэ КъБР-м и Правительствэм и проект щыIэхэм тепсэлъыхьащ КъБР-м транспортымрэ гъуэгу хозяйствэмкIэ и министр ДыщэкI Аслъэн.
КъБР-м узыншагъэр хъумэнымкIэ и министрым и къалэнхэр зыгъэзащIэ Батыр Заурбэч тепсэлъыхьащ узыншагъэр хъумэнымкIэ IуэхущIапIэхэм теухуауэ щыIэ зэхъуэкIыныгъэхэм. Прохладнэ къалэм психиатриемкIэ и сымаджэщыр кхъахэ хъуауэ, ихын хуейуэ къалъытащ. Абы щIэлъа сымаджэхэр республикэм щыIэ психоневрологическэ диспансерым ягъэIэпхъуащ.
Хэку зауэшхуэм щыгъуэ хэкум къыщхьэщыжу хэкIуэдауэ щытахэм я къупщхьэлъапщхьэ къагъуэтыжахэр щIалъхьэным иращIэкIыну Iуэхугъуэхэм папщIэ комитет щхьэхуэ къызэрызэрагъэпэщынум теухуауэ къэпсэлъащ КъБР-м щэнхабзэмкIэ и министр Къумахуэ Мухьэдин. Iуэху къыкъуэкIым елъытауэ, мыр илъэс къэси къызэрагъэпэщ. Iуащхьэмахуэ щIыналъэм щекIуэкIынущ абы ехьэлIа щыгъуэ пэкIур.
ЦIыхухэр хэкупсэу гъэсэнымкIэ къэралым имей, мылъку къегъэщIыным пымыщIа IуэхущIапIэу КъБР-м щыIэхэм республикэ мылъкум къыхэкIыу ахъшэ етыным теухуауэ Правительствэм и проект ягъэхьэзырам тепсэлъыхьащ КъБР-м егъэджэныгъэмрэ щIэныгъэмкIэ и министр Езауэ Анзор.
Бюджет IэнатIэ пэрытхэм я улахуэм хэгъэхъуэным теухуа проектыр игъэбелджылащ КъБР-м лэжьыгъэмрэ цIыхухэм социальнэу къащхьэщыжынымкIэ и министр Асанов Алим.
- 2022 гъэм шыщхьэуIум и 1-м щегъэжьауэ къэрал, кIэзонэ, бюджет, автономнэ IуэхущIапIэхэм я лэжьакIуэхэм я улахуэр хэгъэхъуэн хуейщ проценти 10-кIэ. Республикэ бюджетым щыщу абы текIуэдэнущ сом мелуан 796,4-рэ, - къыхигъэщащ министрым.
Къэбэрдей-Балъкъэрым и бюджет лэжьакIуэхэм я улахуэр проценти 10-кIэ хэгъэхъуэным теухуауэ ди Iэтащхьэм унафэ щищIащ мэкъуауэгъуэм и 15-м иригъэкIуэкIа зэIущIэм.
«Физическэ щэнхабзэмрэ спортымрэ Къэбэрдей-Балъкъэрым зыщегъэужьын» къэрал программэм зэхъуэкIыныгъэхэр егъэгъуэтыным теухуа проектыр къигъэнэIуащ КъБР-м спортымкIэ и министр Хьэсанэ Ислъам.