Зы пIэм имыту зэпымыууэ лъагапIэщIэхэм хуэкIуэ, ехъулIэныгъэхэр зыIэрызыгъэхьэ ди хэкуэгъу актёр, модель цIэрыIуэ ХъуэкIуэн Алим илъэс 20 зэрырикъурэ и гъащIэм къыгуэхыпIэ зимыIэщ камерэмрэ сурэттехымрэ. Москва, Лондон, Нью-Йорк, Афины, Париж, Истамбыл, Рим, нэгъуэщI щIыпIэхэм щытрах фильмхэм, видео клипхэм, модэм теухуа дунейпсо гъэлъэгъуэныгъэхэм адыгэ щIалэр жыджэру хэтщ. Ар ядолажьэ дуней псом и артист, режиссёр, журнал, газет, модель IуэхущIапIэ цIэрыIуэхэм (GIORGIO Armani, Dolce Gabbana, Kenzo, Ostin, Finn Flare, Kanzler, Юдашкин, Savage, Beymen, Iceberg, нэгъуэщIхэми), киногъуазджэ зэхыхьэшхуэхэм зэпымыууэ ирагъэблагъэ.
Дзэлыкъуэ районым хыхьэ Псынэдахэ къуажэм къыщы-хъуа щIалэм лэжьыгъэкIэ е зигъэпсэхункIэ жыпIэми, дуней псом и плIанэпэ куэдым щыIэну къыхуихуащ. ХъуэкIуэн Алим Пятигорск (Псыхуабэ) къалэм «Налоги и налогообложение» IэщIагъэм щыхуеджащ. Хэт и гугъэнт Сочэ къалэм пхъэщхьэмыщхьэхэр ищэну, ухуакIуэу лэжьэну кIуа щIалэм, насыпырыхь джэгум хуэдэу зэрымыщIэкIэ и гъащIэ псор къекIэрэхъуэкIыу театрымрэ киномрэ я актёр, дунейпсо утыкухэм я «вагъуэ» хъуну! Псоми щIэдзапIэ яхуэхъуар Сочэ къалэм лэжьакIуэ щыщыIа илъэситIым къриубыдэу, «Мистер России» зэпеуэм хэт и ныбжьэгъум и Iуэху диIыгъыну щыкIуам, абы и къызэгъэпэщакIуэм Алим гу къылъитэу езыри зэхьэзэхуэм хэтыну зэрыригъэблэгъарщ. Апхуэдэу Сочэ къалэм и цIэкIэ «Урысейм и мистер» зэхьэзэхуэм хэтыну 2009 гъэм къыщыхуагъэлъагъуэм, арэзы хъуащ. ЛэжьапIэм махуэ зыбжанэкIэ зыкъригъэутIыпщри, Алим зэпеуэм и зэфIэкI щеплъыжащ. Иужьрей Iыхьэм абы лъэпкъ фащэр щыгъыу кавказ къафэхэм щыщ игъэлъэгъуащ икIи Урысейм и вице-мистер хъуащ.
- Зэхьэзэхуэм и къызэгъэпэщакIуэхэм компьютер тыгъэ къысхуащIат. Ар сIыгъыу згъэзэжри, ухуэныгъэ лэжьыгъэм сыпэрыувэжащ. Москва къалэм и модель IуэхущIапIэ куэд зэпеуэм къекIуэлIати, абыхэм гу къыслъатэри, си телефонымрэ хэщIапIэмрэ зрагъэщIат. Ухуэныгъэ Iуэхум сыздыхэтым, зыри «сфIэмыкIуэду» къэслъытэри, си зэфIэкI сеплъыжыну сфIэгъэщIэгъуэну сыхыхьат. СызэрыцIыкIурэ зэхьэзэхуэхэм сыхэтыну сфIэфIщ, текIуэныгъэм сыхущIокъу, - игу къегъэкIыж Алим. - Модель IуэхущIапIэхэм ящыщ-хэр кIэщIу къэпсалъэу, Москва сыщылэжьэну сыщрагъэблэгъэм, куэдрэ сымыгупсысэу, аргуэру арэзы сыхъуащ.
Пятигорск - Москва мафIэгум ису Алим нэIуасэ къыхуэхъуа цIыхубзым щеуэршэрылIэм къыжриIат Москва щыкIуа япэ махуэм щегъэжьауэ абы и гъащIэм фIы и лъэныкъуэкIэ зэрызихъуэжынур. УмыгъэщIэгъуэн плъэкIыркъым а псалъэхэр пэж зэрыхъуар. МафIэгу къэувыIэпIэ Къэзан вокзалым пщэдджыжьым сыхьэтихым Алим къыщыпежьащ Водяновэ Наталье зэгуэр дуней псом къезыгъэцIыхуауэ щыта агент Васильев Алексей. Москва щекIуэкIыну «Дахагъэм и тхьэмахуэм» хэтынухэр къыхахыу ирихьэлIэри, абы пхыкIащ. Аращ щIалэм и актёр, модель лэжьыгъэхэм псыпэ яхуэхъуари. Ар ядэлэжьащ режиссёр Бессон Люк, Урысейм, Голливудым я «вагъуэхэу» итальян актрисэ, модель Белуччи Моникэ, уэрэджыIакIуэхэу Мадоннэ, Шейк Иринэ, Натали, Брежневэ Верэ, Къэзан Сэтэ-ней, Лобода Светланэ сымэ, нэгъуэщI куэдми. Алим псом хуэмыдэу дэлэжьэну и хъуэпсапIэщ режиссёр, сценарист, продюсер Ричи Гай. ХъуэкIуэныр псапэ зыпылъ Iуэхуми хэтщ, и гонорарым щыщ сабий зеиншэхэм я фондым ирет, зыхуэныкъуэхэр яхуешэ. КъехъулIэмэ, апхуэдэ фонд езыми къызэригъэпэщыну и мурадщ.
Алим лэжьыгъэ IуэхукIэ нэIуа-сэ къыхуэхъуа цIыху цIэрыIуэ-хэм ятеухуа гъэщIэгъуэн куэд къыбжиIэфынущ. Псалъэм папщIэ, Белуччи Моникэ и гъусэу зыхэта проектым ехьэлIар. IуэхущIапIэм иращIылIа зэгурыIуэныгъэмкIэ, Моникэ и пэшым щIэтын хуейт пхъэщхьэмыщхьэ лIэужьыгъуэ куэд. Езы Алими яхэту, зэрымыщIэкIэ, модель зытхухым а пхъэщхьэмыщхьэм кIэ зэрыратам къаугъэи къахухэкIри ягъэпшынат.
Ди лъэпкъэгъу актёр цIэрыIуэр сыт дэзыхьэхыр жыпIэмэ, спортым, сурэт щIыным, пщафIэм, лъэпкъ зэмылIэужьыгъуэхэм я щэнхабзэмрэ хабзэмрэ, урыс классикэ художественнэ тхыгъэхэм. Зыхилъхьэ щымыIэу фIыуэ елъагъу Булгаков Михаил и «Мастер и Маргарита» романыр. Сидаков Герман театр драмэмкIэ и школыр (2017 гъэ), Москва киномкIэ и школыр (2019 гъэ) къиухащ. ПIалъэ-пIалъэкIэрэ театрхэми щоджэгу. Адыгэбзэмрэ урысыбзэмрэ къищынэмыщIа, тыркубзэ, инджылызыбзэ, испаныбзэхэр зыщIэ режиссёр, сценарист IэщIагъэхэми хуопабгъэ. Киноиндустриер къыщежьа Голливудым а IэщIагъэхэм щыхуеджэну быдэу и мурадщ. Алим зэрыжиIэмкIэ, фильмхэм хьэл-щэн мыхъумыщIэхэр зыхэлъ лIыхъужьхэм я ролхэр щигъэзэщIэну фIэфIкъым, сыту жыпIэмэ абы иужькIэ щIэх зыкъыхуэужьыжыркъым. Зэпымыууэ щIэ лъыхъуэ актё-рым къыхихыр узыгъэгупсысэ, зозыгъэужь, къару къыпхэзылъхьэ ролхэрщ. Апхуэдэу фIэфIщ щытыкIэ шынагъуэ щихуэ теплъэгъуэхэр: бгым къелъэн, хьэкIэкхъуэкIэ Iэлхэм яхэтын хуей щыхъукIэ. Абы и щапхъэщ Европэм и лъэмыж ищIа нэхъ ин дыдэу къалъыта, метр 207-рэ и кIыхьагъыу Сочэ щыIэм къызэрелъар. Псом нэхъ гугъу щыхъуар Отеллэ и ролырщ (Шекспир), ауэ щэ-плIэ джэгуа нэужь, режиссёрым ар къехъулIауэ къилъытащ. Алим щыджэгуащ «Кухня. Война за отель» (2019 гъэ), «Орёл и решка» (2021 гъэ), «Цыцгендер» (2022 гъэ) фильмхэм. Апхуэдэу щыджэгуащ мыгувэу къыдэкIыну, Сокуровым и гъэсэн, режиссёр Хьэмокъуэ Олег и «Узы счастья» фильмым. Комедие, драмэ, боевик жанрхэр нэхъ пэгъунэгъущ.
- Дэтхэнэ зы цIыхуми и гъащIэ гъуэгур езым къыхехыж. Iыхьлы, ныбжьэгъу, цIыхугъэ здэщымы-Iэ хамэ щIыпIэм, дауи, япэщIыкIэ ухэзэгъэну тыншкъым, ауэ псым и жапIэр къэпщIа нэужь, нэхъ ухосыхь. Америкэм и Штат Зэгуэтхэм сыщыпсэуну си хъуэпсапIэщ, ауэ ар хъуэпсапIэу къэнэжынущ. «Бланэ щалъху мэкIуэж», - жеIэ адыгэ псалъэжьым. Илъэс 12 хъуауэ Европэм сыщыIэми, си адэ-анэр щыпсэу, си къуэпсыр къыщежьа щIыналъэм зэпымыууэ сыхуопаб-гъэ. Дэнэ щIыпIэ сыщыIэну къысхуихуами, гукIи, псэкIи, IэпкълъэпкъкIи щызу зыщызгъэпсэхур Къэбэрдей-Балъкъэрырщ! Iэмал имыIэу илъэсым зэ сыкъокIуэж ди щIыналъэм. Си ныбжьыр хэкIуатэмэ, си къуажэжь сыщыпсэуну къэзгъэзэжынущ, - жеIэ Алим. - Си адэ Резуан и лэжьыгъэкIэ хьэрычэтыщIщ, си анэ Людэ дохутырщ. «Газета Юга» къыдэкIыгъуэм и япэ напэкIуэцIым сэ стеухуа тхыгъэрэ си сурэтрэ япэу къыщытрадзам си адэ-анэм гуапэ ящыхъуауэ щытащ. Си анэшхуэм зэхуехьэс газетхэмрэ журналхэмрэ сэ къызэхьэлIауэ къытехуэ псори. Нэхъыщхьэр уи хъуэпсапIэхэр гъащIэм щызэбгъэхъулIэнырщ, щIэм ухущIэкъунырщ.
Алим и ныбжьыр илъэс 30 ирикъуами, унагъуэм зэкIэ хуэмыхьэзыру къелъытэ, сыту жыпIэмэ зэманышхуэ зытекIуадэ и лэжьыгъэр япэ ирегъэщ. Курыт еджапIэм зэрыщIэсрэ щIыпIэ дахэхэм зыплъыхьакIуэ, кIуэну щIэхъуэпсырти, иджы и лэжьыгъэ Iуэхумрэ абырэ зыр адрейм къыгуэхыпIэ имыIэу зэпхащи, зыщIэхъуэпсар къехъулIауэ жыпIэ хъунущ.
Псынэдахэ къуажэм къыдэкIа щIалэм и зэфIэкIхэр и щапхъэщ шыIэныгъэрэ ерыщагърэ пхэлъмэ, узыпэрыт Iуэхум уелIалIэмэ, гъащIэм къуит Iэмалхэр къэбгъэсэбэпмэ, уи хъуэпсапIэ псори зэрызэбгъэхъулIэфынум, уи дунейр зэрыпхуегъэфIэкIуэнум.