Зи гъащIэр цIыхухэм тыхь яхуэзыщIа

«ЩIыхьым и дамыгъэ» орденызрата, КъБР-м щIыхь зиIэ и дохутыр, категорие нэхъыщхьэ зиIэ дохутыр Джэрыджэ Розэ Азрэт и пхъур илъэс 50-м щIигъукIэ Республикэ онкологие диспансерым щылэжьащ.
Джэрыджэ Розэ Налшык щыпсэу бынунагъуэшхуэ зэгурыIуэм къыхэкIащ. Абы и анэр пасэу фIэкIуэдащ - ар ихьащ лышх узыфэм. А узыфэ бзаджэм пэщIэтын мурадкIэ Розэ мурад ищIат дохутыр-онколог хъуну. Иджыри медицинэ училищэм щеджэу абы Республикэ онкологие диспансерым лэжьэн щыщIидзащ. ЯпэщIыкIэ операцэ щащI къудамэм санитаркэу, иужькIэ медсестрауэ щыIащ. КъБКъУ-м и медицинэ факультетыр къиуха нэужь, диспансерым и хирургие (абдоминальнэ) къудамэм и дохутыр-онкологыу лэжьащ. Нэхъ иужькIэ Петров Н.Н. и цIэр зэрихьэу Ленинград дэт, онкологиемкIэ щIэныгъэ-къэхутакIуэ институтым и клиникэ ординатурэм и Iэзагъэм щыхигъэхъуащ. Республикэм къигъэзэжа нэужь а къудамэ дыдэм и унафэщIу ягъэуващ икIи а къулыкъум пэрытащ илъэс 36-кIэ.
Джэрыджэр пщыдджыжьым къыщыщIэдзауэ пщыхьэщхьэр хэкIуэтэху лэжьапIэм щыIэт, зэрыхузэфIэкIкIэ цIыхухэм ядэIэпыкъуу. Бгъэдэлъ щIэныгъэ куум и фIыгъэкIэ абы лышх узыфэр зыхуэдэр тэмэму къихутэрти, ехъулIэныгъэ иIэу операцэхэр иригъэкIуэкIырт. Я гъащIэм иухыгъуэ пIалъэр къэсауэ къызыщыхъуж куэдым зэрыхъужынумкIэ гугъэхэр яхилъхьэжащ. Абы хузэфIэкIащ цIыху куэд къызэфIигъэувэжын - иджырей IэзэкIэхэм Iэмал къуат лышхыр зыпкърытыр бгъэхъужыну.
    Розэ гулъытэшхуэ хуищIырт онкологие узыфэр и чэзум къэхутэным, абы къыхэкIыу цIыхухэр сытым дежи къыхуриджэрт я узыншагъэр щIэх-щIэхыурэ къапщытэну.
    Республикэ онкологие диспансерым и тхыдэр къыгуэхыпIэ имыIэу епхащ Джэрыджэ Розэ. Абы къыхуагъэфэщащ Урысей Федерацэмрэ Къэбэрдей-Балъкъэрымрэ Узыншагъэр хъумэнымкIэ я министерствэхэм, республикэм и жылагъуэ зэгухьэныгъэ куэдым я щIыхь тхылъхэр, «Лэжьыгъэм и ветеран», «Узыншагъэр хъумэнымкIэ IэнатIэм и отличник» дамыгъэхэр. Ауэ нэхъ тыгъэ лъапIэу абы иIар сымаджэхэм къыхуаIэ лъагъуныгъэрт, пщIэрт, фIыщIэрт.

Тхьэхущынэ Ланэ.
Поделиться: