КIуэкIуэ Юрий

(2013 - 2018 – КъБР-м и Iэтащхьэ)
Полицэм и генерал-полковник, УФ-м къэрал кIуэцI IуэхухэмкIэ и органхэм щIыхь зиIэ я лэжьакIуэ КIуэкIуэ Юрий Александр и къуэр зи IуэхущIафэкIэ зи пщIэр къэзылэжьыжа, жэуаплыныгъэ зыхэлъ цIыхущ. 
Ар I955 гъэм шыщхьэуIум и 13-м Налшык къалэм къыщалъхуащ. Ростов дэт къэрал университетым и юридическэ факультетыр I979 гъэм къиухри, къэрал кIуэцI IуэхухэмкIэ органхэм щылажьэу щIидзащ.
I979 гъэм щегъэжьауэ 1987 гъэм нэсыху КъБР-м и МВД-м и уголовнэ къэлъыхъуакIуэ IэнатIэмрэ социалистическэ мылъкур зыдыгъухэм ебэнынымкIэ и IэнатIэмрэ къулыкъу зэмылIэужьыгъуэхэр щиIыгъащ.
1987 гъэм щегъэжьауэ 1991 гъэм нэсыху Къэбэрдей-Балъкъэр Республикэм и Министрхэм я Советым и административнэ-финанс къудамэм и унафэщIу лэжьащ.
1991 гъэм щыщIэдзауэ I995 гъэм нэсыху КъБР-м и МВД-м и криминальнэ милицэм и унафэщIым и къуэдзэу, Экономикэ щIэпхъаджагъэхэм ебэнынымкIэ управленэм и унафэщIу щытащ. 1995 – 1999 гъэхэм КъБР-м къэрал кIуэцI IуэхухэмкIэ и министрым и къуэдзэщ – криминальнэ милицэм и унафэщIщ.
Къэбэрдей-Балъкъэр Республикэм и Парламентым ЛIыкIуэхэмкIэ и Палатэм тIэунейрэ (I993, I997 гъэхэм) хахащ икIи абы Законодательствэмрэ шынагъуэншагъэмкIэ и комитетым и унафэщIу щытащ.
I999 гъэм Москва къалэм яшэри, Урысейм и МВД-м и КъызэгъэпэщакIуэ-инспектор инспекцэ нэхъыщхьэм и инспектор нэхъыщхьэм и къулыкъум ягъэуващ.
2003 гъэм щыщIэдзауэ Урысейм и МВД-м ЗэщIэгъэуIуауэ ялэжь щIэпхъаджагъэхэм япэщIэтынымкIэ и управленэ нэхъыщхьэм и унафэщIым и къуэдзэу, 2005 гъэм щыщIэдзауэ Урысейм и МВД-м зэщIэгъэуIуауэ ялэжь щIэпхъаджагъэхэм ебэнынымкIэ и департаментым и унафэщIым и япэ къуэдзэу щытащ.
2008 гъэм КIуэкIуэ Юрий Урысейм и МВД-м Экстремизмэм пэщIэтынымкIэ щIэуэ къызэрагъэпэща и департаментым и унафэщIу ягъэуващ.
2011 гъэм и мэкъуауэгъуэ мазэм Урысей Федерацэм и Президентым и УказымкIэ полицэм и генерал-полковник КIуэкIуэ Юрий Александр и къуэр УФ-м и МВД-м Экстремизмэм пэщIэтынымкIэ и управленэ нэхъыщхьэм и унафэщIу ягъэуващ.
2012 гъэм и фокIадэ мазэм щегъэжьауэ Урысей Федерацэм Къэрал кIуэцI IуэхухэмкIэ и министерствэм и лэжьакIуэхэм я щIэныгъэм щыхагъахъуэ Урысейпсо институтым и унафэщIщ.
2013 гъэм дыгъэгъазэм и 6-м КIуэкIуэ Юрий Александр и къуэр Къэбэрдей-Балъкъэр Республикэм и Iэтащхьэм и къалэнхэр пIалъэкIэ игъэзэщIэну къагъэкIуэж. 
Нэхъ ипэкIи Хэкум щIэх-щIэхыурэ лъагъунлъагъу къэкIуэжырт ар, ауэ 2005 гъэм жэпуэгъуэм и I3-м щIэпхъаджащIэхэр Налшык къалэм къытеуа нэужь, КIуэкIуэ Юрий Къэбэрдей-Балъкъэрым къэлъэтащ, МВД-мрэ ФСБ-мрэ зэуIу ящIа я гупым и унафэщIу. Командировкэр илъэсым щIигъукIэ екIуэкIащ. Езы Iуэхур зэхэгъэкIыныр илъэсипщIым нэблагъэкIэ екIуэкIащ. КIуэкIуэ Юрий 20I3 гъэм и дыгъэгъазэм къыщыщIэдзауэ Къэбэрдей-Балъкъэр Республикэм и Iэтащхьэу лэжьащ. 
А зэманым къриубыдэу щIыналъэм щызэфIагъэкIар мащIэкъым: IуэхущIапIэщIэхэр къэунэхуащ, мэкъумэш IэнатIэр кIуэ пэтми йофIакIуэ, социальнэ Iуэхухэм гулъытэ ин ягъуэтащ, инвестицэ Iуэхухэм заужь, сымаджэщ, сабий гъэсапIэ, курыт еджапIэ, щэнхабзэмкIэ унэщIэ пщIы бжыгъэхэр къызэIуахащ. И мыхьэнэкIэ нэхъ цIыкIукъым щIыналъэм зыгъэпсэхуакIуэ къакIуэхэм я бжыгъэм зэрыхэхъуари. Шэч хэмылъу, а псор зи ехъулIэныгъэр псом япэу КIуэкIуэ Юрийрэ абы къуэту дэлэжьахэмрэщ. 
Къэрал, ведомствэ дамыгъэхэр, абыхэм «Жылагъуэ хабзэр хъумэнымкIэ зэфIэкI зэрыбгъэдэлъым папщIэ» медалыр, ЛIыхъужьыгъэ орденыр, «Хэкум и пащхьэм щиIэ фIыщIэхэм папщIэ» орденым и IV нагъыщэр яхэту, къратащ. 

 

НэщIэпыджэ Замирэ.
Поделиться: