И къулыкъум тезэша?

 Шэшэным и Iэтащхьэ Кадыров Рамзан иджыблагъэ жиIащ и къулыкъум тезэшауэ, ауэ ар зэриIыгъ пIалъэм и кIыхьагъымкIэ псоми ятекIуэну и мураду. ЗэкIэ рекордыр зейр илъэс 27-кIэ Белгород областым и Iэтащхьэм и къулыкъур зезыхьа Савченкэ Евгенийщ. Кадыровым ар къызэрехъулIэнум шэч хэлъкъым.
Иджыпстуи щIыналъэхэм я унафэщIхэм яхэткъым абы нэхърэ нэхъыбэрэ тета. ТрагъэкIынкIи щIэгузэвэн щыIэкъым: и къулыкъум полъэщ, цIыхубэр и телъхьэщ. Абы и щыхьэтщ илъэс зыбжанэ и пэкIэ «и зэманыр икIауэ», и блыгущIэтхэм ящыщ зыр къигъанэу «текIыну» щыжиIами, ар псынщIэу зэрыIурагуэжар.
Псом япэу Кадыровым и цIэм ирапх Шэшэныр зэфIэгъэувэжыным и Iуэхум къыщахьа ехъулIэныгъэ псори. Зауэхэм зэхафыщIа республикэр къызэфIэувэжа къудейкъым, атIэ къыпхуэмыцIыхужыну къэщIэрэщIэжащ.
 Мыбы нэгъуэщIи хэлъщ - иджы щIыналъэхэм я Iэтащхьэхэм хуагъэувыркъым щылэжьэну пIалъэр. Мурадыр зыхуагъэзари, зэрахъуэкIынкIэ мыпIейтейуэ я къалэнхэр ягъэзэщIэнырщ. Зэрытлъагъущи, властхэм яIэкъым Рамзан щIыхуэмыарэзын щхьэусыгъуэ.
Пэжу, къыумылъытэнкIэ Iэмал иIэкъым нэхъ сэбэп щыхъуну нэгъуэщI IэнатIэ ягъэкIуэнкIэ зэрыхъунури. Зэгуэр ягъэхъыбаращ ар Урысейм и гвардием и унафэщIу ягъэувыну е Донбассым къыщыунэхуа щIыналъэщIэхэм полномочнэ лIыкIуэу ягъэкIуэнкIэ хъуну. Ауэ зэкIэ зыми къыхуэщIакъым Кремлым ичынкIэ хъуну лъэбакъуэр зыхуэдэр. Дауи, а псоми езым и арэзыныгъэ хэлъын хуейщ.