Мэлычыпхъурэ и лIымрэ зэман зыкъомкIэ зэдэпсэуауэ, и лIым къригъэкIыжын хуей хъуащ. Мэлычыпхъу псомкIи и лIым еIущэкIырти, ар игу темыхуэу:
- УизгъэкIыжынущI - жиIащ лIым.
- Хъунщ, ауэ сибгъэкIыжын и пэкIэ, уи ныбжьэгъухэр зэ къызэхуэшэсыжи, ефэ-ешхэ яхуэзгъэщIыж, IэфIкIэ ягу сыкъинэжын хуэдэу, - жиIащ Мэлычыпхъу.
ЛIым и ныбжьэгъухэр, хъыбар яригъащIэри, къызэхуишэсащ. Мэлычыпхъу Iэнэр къахуиузэдщ, мэрэмэжьейр гуащIэу къахутригъэувэри, жиIащ:
- Сэ си лIым срегъэкIыж, мы зэм фIэкIа си Iэнэм фыпэрысыжынукъыми, сыныволъэIу, си хьэтыркIэ, фызэфэфи фшхыфи къэвмыгъэнэну. Ар хьэщIэхэм щэхуу елъэIуащ, и лIыр ирагъафэурэ чэф ящIыну.
ХьэщIэхэр, ялъэкI къамыгъанэу, ефащ, ешхащ. Мэлычыпхъу и лIыр ирагъафэурэ чэф хьэлъэ ящIащ. ЯгъэукIуриижри езыхэр зэбгрыкIыжащ.
Мэлычыпхъу гур зэщIригъащIэщ, илI чэфыр иригъэукIуриери, къежьэжащ.
КъыздэкIуэжым, нэхуи къатещхьауэ, гъуэгум и зэхуэдитIри къакIуауэ, и лIыр къызэщыуащ.
- Мыр сыт? Дэнэ дыздэкIуэр? – жиIащ лIым.
- Сэ сибгъэкIыжауэ си унэ сокIуэж, - жиIащ Мэлычыпхъу.
- АтIэ сэ сыт щхьэкIэ сынакIуэрэ? – жиIащ лIым.
- СыкъибгъэкIыж хъужыкъуэмэ, си нэ къыфIэнэу зы къисхыну жысIэри, апхуэдэ быдагъэ зэтщIылIат, си нэ къыфIэнар уэрати, укъисхауэ сокIуэж, - жиIащ Мэлычыпхъу.
ЛIыр егупсысри:
- Хьэуэ, Мэлычыпхъу щикIыжым и лIыр здрихащ жаIэу, напэтехщ. Нэгъазэ! – жиIэри, къагъэзэжри къэкIуэжащ. Абы и ужькIэ зэлIзэфызым яку псалъэмакъ лъэпкъ дэмылъу, лIэжыху зэдэпсэуащ жаIэ.
