Жьыр къыщепщэр

КъБР-м Къалэн куэд щагъэзащIэ и щIалэгъуалэ центрым экстремиз­мэмрэ терроризмэмрэ пэщIэ­ты­нымкIэ лэжьыгъэ купщIафIэхэр ирегъэкIуэкI.

Къапщтэмэ, 2022 гъэм республикэм и еджапIэ нэхъыщхьэхэм, курытхэм, школхэм семинар 18 къыщызэрагъэпэщащ. Абыхэм ирагъэблэгъащ дин лэжьакIуэхэмрэ хъыбарегъащIэ Iэ­натIэхэм я IэщIагъэлIхэмрэ.
Экстремизмэмрэ терроризмэмрэ пэщIэтын зэрыхуейм теухуа нэтынхэмрэ фильмхэмрэ гъэлъэгъуэнми мы­хьэнэшхуэ яIэщ. Апхуэдэ Iуэхугъуэу КъБР-м Къалэн куэд щагъэзащIэ и щIалэгъуалэ центрым къызэригъэпэщахэм цIыху 2100-рэ къызэщIрагъэубыдащ.
КъищынэмыщIауэ, республикэм и спорт IуэхущIапIэу 3-м IэщIагъэлIхэр щытепсэлъыхьащ мамыру псэуным нэхъыфI зэрыщымыIэм, экстремиз­мэмрэ терроризмэмрэ япылъ шына­гъуэм, абыхэм япэIэщIэу зэрыщытыпхъэм. А Iуэхум хыхьэу, спортсмен ныбжьыщIэхэм хуагуэшащ «Терроризмэм дрибийщ» псалъэхэр зытратха, псы зракIэ птулъкIэхэр.
Гъэмахуэ зыгъэпсэхугъуэ зэманым сабий лагерхэм семинари 4 щекIуэ­кIащ, гъащIэр, дунейр хъумэн зэры­хуейр я лъабжьэу.
Зэрыхабзэу, фокIадэм и 1 - 3-хэм гъэ къэс ЩIалэгъуалэ центрым ирегъэ­кIуэкI «Терроризмэм дрибийщ» зи фIэщыгъэ флешмобыр. Мы гъэм абы хэтащ Налшык къалэм и лицей №2-м и еджакIуэхэр. Зэхуэсым кърихьэлIахэр усэхэм къеджащ, Беслъэн къалэм къыщыхъуауэ щыта гузэвэгъуэм траухуауэ.
ЩIалэгъуалэ центрыр жыджэру йолэжь экстремизмэмрэ терроризмэмрэ пэщIэтыным ехьэлIа роликхэмрэ баннерхэмрэ социальнэ сетхэм щызэбгрыгъэкIынми. Апхуэдэ лэжьыгъэхэр  кърет КъБР-м и МВД-м. Къызэ­раху­тамкIэ, абыхэм цIыху мини 2,5-рэ мынэхъ мащIэ йоплъ.
Илъэс къэс фокIадэм республикэм щокIуэкI «Терроризмэмрэ экстремиз­мэмрэ дрибийщ» зыфIаща Iуэхур. Абы и зы хабзэщ, цIыхухэм плIэхэр, пыIэхэр, махуэгъэпсхэр хуагуэшыныр. Хьэп­шыпхэм тетщ щIалэгъуалэм Iуэху мыхъу­мыщIэхэм зыдрагъэхьэх зэры­мыхъунур къызыхэщ гупсысэхэр.
- ЩIалэгъуалэм щIэх-щIэхыурэ допсалъэ, терроризмэм пэщIэтынымкIэ дэфтэрхэр зи лъабжьэ фильмхэм идогъэплъ, - жеIэ КъБР-м Къалэн куэд ща­гъэзащIэ и щIалэгъуалэ центрым и IэщIагъэлI Къарэ Ратмир. – Абы и лъэныкъуэкIэ дыдолажьэ «КъБР-Медиа» къэрал IуэхущIапIэм, псом хуэ­мыдэу террорым пэщIэтыным хуэгъэзауэ а IэнатIэм къыдигъэкI плIэхэмрэ пыIэхэмрэ щIалэгъуалэм яхудогуэш. КъищынэмыщIауэ, хабзэ хъуауэ, сабийхэр Беслъэн къалэм дошэ, абы къыщыхъуа гузэвэгъуэм хэкIуэдахэм я фэеплъым пщIэ хуэтщIу. ЩIалэгъуа­лэм дыщепсалъэм, семинар къы­щызэдгъэпэщым деж тегъэщIапIэ ­нэхъ тщIыр цIыхур жьыр къыздепщэмкIэ зримыгъэхьу, езым гупсысэкIэ щхь­эхуэ иIэжу, нэгъуэщIхэм я Iуэхухэм зыдримыгъэшэхыу, адэ-анэм едаIуэу псэун зэрыхуейрщ. НэгъуэщI зы Iуэ­хуфI­ми гулъытэ худощI – ар я къалэн ягъэзащIэу хэкIуэдахэм я фэеплъу спорт зэхьэзэхуэхэр едгъэкIуэ­кIы­нырщ.