Iэгуауэшхуэр хуаIэтырт

Дуней псом тет лъэпкъхэр зыхэзыгъаплъэ гъуазджэ лIэужьыгъуэщ къафэр. КъэфакIуэ щIэблэ зи куэдхэм я гугъу пщIымэ, ар КъБР-м щIыхь зиIэ и артист Нэгъуд Борисрэ Любэрэ я унагъуэрщ.

Гъуазджэм и тхыдэм ахэр хыхьат зы гъащIэ гъуэгуанэ щытеувам къыщыщIэдзауэ. Челябинск щIыналъэ жыжьэм къикIыу Бахъсэн дэс и Iыхьлыхэм я деж хьэщIапIэ къэкIуа Любэ Къэбэрдей-Балъкъэрым и щIыуэпсымрэ лъэпкъ къафэхэмрэ зэуэ дахьэхат. Хъыджэбзыр Налшык дэт культпросветучилищэм къафэмкIэ и къудамэм щIэтIысхьащ. И насып кърихьэкIри, СССР-м и цIыхубэ артист, Социалист Лэжьыгъэм и ЛIыхъужь Эсамбаев Махьмуд и япэ егъэджакIуэ Форманчук Марие деж абы зыщигъэсэну Iэмал игъуэтат. ЕхъулIэныгъэ иIэу Любэ еджапIэр къыщиухым, и ныбжьэгъу цIыкIухэм трагъэгушхуэри, «Кабардинка» ансамблым хыхьэну кIуащ.

… Пщащэ зэкIужым занщIэу гу къылъатащ: лъэпкъ фащэр къыщатIэгъащ, къэфэну къелъэIуащ. Ансамблым и унафэщIхэм абы и зыIыгъыкIэр ягу ирихьати, Пионерхэм я унэм екIуалIэ сабийхэм къафэмкIэ ядэлэжьэн щIэзыдза хъыджэбз гуапэр а махуэм «Кабардинка»-м и гупым хагъэхьащ. Апхуэдэу Любэ и хъуэпсапIэ нэхъыщхьэр къехъулIат. Лэжьыгъэ гугъу къыпэщылъми, ар и Iуэхум дихьэхыщати, абы щыкIуэнум хуэпIащIэ зэпытт. ГъащIэ гъусэ хуэхъунури аращ къыщицIыхуар - ар къэфакIуэ ахъырзэману ансамблым хэт Нэгъуд Борист. Борисрэ Любэрэ «Кабардинка»-м и зы хабзэм пащащ: утыкум зэгуэгъуу къыщыфэ зэщхьэгъусэхэм я бжыгъэм хагъэхъуащ.

Абыхэм я зэфIэкIи хэлъу цIэрыIуэ хъуа къэфакIуэ гупым къалэхэр, къэралхэр къахьэхурт. Ансамблым хэту, Любэ Африкэм и къэралиплIым (Алжир, Марокко, Тунис, Ливие) зэрыщыIам щхьэхуэу щытепсэлъыхьыжкIэ, ноби пIейтейщ. Къэфэным и мызакъуэу, абы концертхэри бзитIкIэ иригъэкIуэкIын хуейуэ и пщэрылът. Инджылызыбзэр школым фIыуэ щиджат, ауэ хьэрыпыбзэр зригъэщIа къудейти (хамэ къэрал къикIауэ КъБКъУ-м щеджэхэр къыдэIэпыкъуат), абы тешыныхьырт.

Любэ жеIэ: «Ансамблыр ежьэным и пэ къихуэу, СССР-м ЩэнхабзэмкIэ и министерствэм «Кабардинка»-р дригъэблэгъауэ унафэщIхэр къыдэпсалъэрт. Абыхэм къыджаIащ хьэрыпхэр сыт щыгъуи щIыIэ-щIыIэу совет артистхэм къазэрыIущIэр. «Я Iэгуауэ зэхэфхыну фыщымыгугъ. Я щхьэр арэзыуэ ящIыххэмэ, ягу фрихьауэ аращи, зэвгъадэ», - жаIат».

Зэрыхъуар нэгъуэщIущ: Алжир и концерт гъэлъэгъуапIэм и утыкум адыгэ фащэр къыщыпсу Любэ утыку къыщихьэм, пэшым Iэгуауэшхуэр занщIэу къыщIэIукIат, зэрежьа щIыкIэуи концертыр иухыхункIэ екIуэкIащ. Латин Америкэми ансамблыр илъэситI къэс здэкIуэу щыта адрей къэралхэми гупым хэтхэм къыщыщытхъуу къэгъуэгурыкIуащ. Борис къэрал 60-м щыIащ, Любэ - 40-м.

«Кабардинка»-м илъэс тIощIкIэ къыщыфащ ахэр. Борис и утыку итыкIэм пэшым щIэсыр игъэдымырт, дэтхэнэми и гум дыхьэрт абы и къэфэкIэр. Нэгъудм и урыс щхьэгъусэми цIыхухэр къыдихьэхырт осетин, авар, куржы, акушин къафэхэмкIэ.

Нэгъуд зэщхьэгъусэхэм я щIалэ пажэ Романи лъэпкъ къафэхэр и псэм хэлъщ, 11-нэ классым щIэсу арат Роман «Балкария» ансамблым и къэфакIуэ щыхъуам. ЗэфIэкI къызэрымыкIуэхэр зыбгъэдэлъ щIалэр гугъу лъэпкъ демыхьу щIэтIысхьат Краснодар дэт щэнхабзэмкIэ къэрал институтым (иджы ГъуазджэхэмкIэ академиещ). Роман и лауреатщ Урысейм ис лъэпкъхэм я Артиадэм, «Сердце отдаю детям» республикэ зэпеуэми пашэ щыхъуащ. Романи и щхьэгъусэри «Кавказ» ансамблым къыщыфащ, иджы абыхэм я бынхэр къофэ.

Мы зэманым Нэгъуд Борис унагъуэм ящхьэщымытыжми, абы и IуэхуфIым пащэ и шхьэгъусэ Любэрэ я щIалэ Романрэ. Роман и адэм и цIэр зэрихьэу лъэпкъ къафэхэмкIэ школ къызэригъэпэщащ, абы къекIуалIэ щIалэгъуалэм ехъулIэныгъэфIхэр яIэщ.