Хьэх Сэфарбий Хьид и къуэр

Къэбэрей-Балъкъэр Республикэм щэнхабзэмкIэ и IэнатIэм хэщIыныгъэшхуэ игъуэтащ - и ныбжьыр илъэс 84-нэм иту дунейм ехыжащ къэбэрдей тхакIуэ, усакIуэ, КъБР-м и ТхакIуэхэм я союзым, КъБР-м и Журна­листхэм я союзым хэт Хьэх Сэфарбий Хьид и къуэр.
1945 гъэм щегъэжьауэ 1955 гъэм нэсыху ар Аушыджэр къуа­жэм и курыт школым щеджащ. ИужькIэ IэщIагъэ зыбжанэм ирилэжьащ . Горький Максим и цIэр зэрихьэу Москва дэт Литерату­рэ институтым 1966 гъэм щIэтIыс­хьэри, ар 1971 гъэм къиухащ. 1972 гъэм щыщIэдзауэ «Ленин гъуэгу» газетым щылэжьащ, ­нэхъ иужькIэ республикэ газетым щэнхабзэмкIэ и къудамэм и унафэщIу ягъэуври, а IэнатIэм пэрытащ 1998 гъэм нэсыху. Га­зетым и редколлегием хэтащ, «Адыгэ псалъэ» газетым и журналистхэм я пэщIэдзэ органи­зацэм и секретару щытащ. Ап­хуэдэу Хьэх Сэфарбий къаруушхуэ ирихьэлIащ «Шыхулъа­гъуэ» литературэ зэгухьэныгъэр зэтегъэувэным, тхэн щIэзыдзэ щIалэгъуалэр гъэсэным.
Хьэх Сэфарбий художественнэ зэфIэкIышхуэ бгъэдэлъащ, абы и усэхэр бзэ дахэкIэ гъэп­сауэ, щалъхуа щIыналъэм, къы­зыхэкIа лъэпкъым яхуиIэ лъа­гъуныгъэмкIэ гъэнщIауэ щытащ.
Хьэх Сэфарбий фIыщIэ ин бгъэдэлъщ урыс усакIуэшхуэхэу Пушкин Александр, Есенин Сергей, Михалков Сергей сымэ я ­IэдакъэщIэкIхэр IэкIуэлъакIуэу адыгэбзэм къызэригъэзэгъамкIэ. Апхуэдэу абы зэридзэкIащ балъкъэр усакIуэ, тхакIуэ цIэрыIуэхэу Созаев А., Беппаев М., Бегиев Хь., Гуртуев О., Боташев И., Токумаев Ж., Гуртуев Э., Шаваев Хь., Тепеев А. сымэ я тхыгъэ куэд.
Зэчиишхуэ зыбгъэдэлъа, гуа­щIафIэу, гуапагъэрэ гулъытэрэ хэлъу дунейм тета цIыху хьэ­лэ­мэтыр дэ зэи тщыгъупщэнкъым.

КъБР-м ЩэнхабзэмкIэ и министерствэ
КъБР-м и ТхакIуэхэм я союз
КъБР-м и Журналистхэм я союз.