УхуакIуэхэр бэлэрыгъыркъым

2022 гъэм къриубыдэу Къэбэрдей-Балъкъэрым ухуэныгъэу 48-рэ икIэм щынагъэсынущ, къанэ щымыIэу зыхуей хуагъэзэжахэри хэту: курыт еджапIэхэр, медицинэ, щэнхабзэ, спорт IуэхущIапIэхэр. Къэрал, республикэ бюджетхэм къыхэкIыу абы трагъэкIуэдэнур сом меларди 7-м нос.
Республикэм гулъытэшхуэ щигъуэтащ псэупIэ унэхэр ухуэнми; мы гъэм и япэ мазитхум къриубыдэу фэтэр унэ зэтету хьэзыр ящIащ гъэ кIуам нэхърэ хуэдитIым нэблагъэкIэ нэхъыбэ. Ауэ щыхъукIэ, жьы хъуа унэхэм цIыхур къыщIэгъэIэпхъукIынымкIэ лэжьыгъэ нэхъыбэ щызэфIагъэкIа щIыналъэхэм хабжащ Къэбэрдей-Балъкъэрыр.
Къалэкум щекIуэкI ухуэныгъэ нэхъ инхэм ящыщщ, къапщтэмэ, Головком и уэрамым и кIэм щынагъэс сабий поликлиникэр. ИпэкIи и гугъу зэрытщIащи, ар къыпащIыхь абдеж дыдэм ит поликлиникэм, IуэхущIапIэм и лэжьыгъэм зыкIи зэран хуэмыхъуу. Мы махуэхэм унащхьэр тралъхьэ, абы къыдэкIуэу блынхэми йолэжь, бжьамийхэр, ток кIапсэхэр ирашалIэ.
Апхуэдэу Iуэхум щоужьэрэкI Хъураным и уэрамым жьы дыдэ хъуауэ тета къалэ сымаджэщым и хирургическэ къудамэр ирахыу абы и пIэм къыщрагъэжьа поликлиникэщIэми. Мы махуэхэм щIадзауэ блыныр чырбыш плъыжькIэ дращIей, техникэ хьэлъэхэм я лэжьыгъэми зэпыу иIэкъым. Фигу къэдгъэкIыжынщи, иджырей мардэхэм тету абдеж щаухуэ медицинэ IэнатIэр нэхъыфIу къызэгъэпэщахэм я бжыгъэм хэувэнущ.