ЦIыхумрэ плъыфэмрэ

Плъыфэ куэд щыдолъагъу мы дунейм. Лэгъупыкъур зи теплъэу щыт гъащIэр куэдрэ къытхуотыгъэ хужьыгъэкIэ. Ди жагъуэ зэрыхъущи, иужьрей зэманым бжьыпэр иIыгъщ фIыцIафэм. Абы и щхьэусыгъуэхэри гурыIуэгъуэу къыщIэкIынщ: уз шынагъуэ, лэжьыгъэншэ, мэжэщIалIагъэ, цIыхугъэншагъэ, зэрыукI…

ЦIыхухэм сфIэгъэщIэгъуэну куэдрэ сакIэлъоплъ. Мы махуэхэм нэхэр нэхъ зытеплъызэу щытар плъыфэхэрщ, цIыхухэм ящыгъ щыгъынхэм я плъыфэхэрщ. Москва метром сыт щыгъуи цIыхур щыкуэдкъэ-тIэ? ГъэунэхупIэ щIыпIэу къыхэсхари аращ.

Сызэплъа, зэпэсплъыхьа цIыхухэм ящыщу процент 89-м ящыгъыр щыгъын  фIыцIафэщ. Куэдым жыфIэнкIи хъунущ: «ЩIымахуэщ, аращ апхуэдэу щIыщытыр!» Си жэуапыр: «Хьэуэ!» Гъэмахуэри, бжьыхьэри, гъатхэри хэзгъэхьащ  си  кIэлъыплъыныгъэм. ЦIыхухэм я процент II-рщ цIуугъэнэр къыхэзыхыр.  Си щхьэкIэ сыкъапщтэмэ, нэм занщIэу къипхъуатэ плъыфэ сфIэфIми, фIыцIафэкIэ сыерыщщ. Си нэIуасэ цIыхубз гуэр сыхуэзати, псалъэмакъыр плъыфэхэм щынэсым, къызжиIар сфIэтелъыджэщ: «ФIыцIэкIэ ухуэпами, Беслъэн, хужьу узолъагъу!»

ЩIагъыбзэкIэ псалъэ къызиIуэкIами, гушыIэу жиIами, сщIэркъым, ауэ сыту пIэрэ зэлъытар цIыхум уеплъа нэужь, ар зыхуэбгъадэ плъыфэр?