Куэдыр щыгуфIыкIынущ

Иужьрей илъэсхэм фермер хозяйствэхэм я бжыгъэм хэхъуэ зэпытщ. Абыхэм кIуэ пэтми заужь, езыхэм я Iуэхур щызэрахьэн административнэ унэхэр яIэн хуейуэ. Нобэм къэс апхуэдэ ухуэныгъэхэр лэжьыгъэр къышрахьэлIэ щIым щаухуэну хуит ящIу щытакъым. Нэгъабэ щытыкIэм зихъуэжащ.
Урысейм и Президентым УФ-м и земельнэ кодексым мы гъэм хилъхьа зэхъуэкIыныгъэхэм емыбакъуэу, иджы фермерхэр хуитщ апхуэдэ псэупIэ икIи лэжьапIэ унэхэр Iэщ фермэхэм пэгъунэгъуу щаухуэну. Мыбдежым къэлъытапхъэщ, абыхэм я лъагагъыр къатищым, и инагъыр метр зэбгъузэнатIэ 500-м, унэ лъабжьэм и лъагагъыр ар зытращIыхь щIым и процент 0,25-м фIимышу щытын зэрыхуейр. Абы папщIэ щIы гектари 5-м нэблагъэ яIыгъыни хуейщ. Коттедж мардэм тету унэхэр яухуэу ядэнукъым.
Ухуэныгъэхэр къыщIэбдзэн ипэ гъэлъэгъуэн хуейщ щIыр уэ езым узэрыуейм щыхьэт техъуэ тхылъымрэ къебгъэжьэну ухуэныгъэм ехьэлIа псори къыщыгъэлъэгъуа техническэ планымрэ. Ухуэныгъэр къыщрагъэжьэнумрэ щаухынумкIэ пIалъэ пыухыкIа ткIийуэ къыпаубыдынукъым. Ауэ ар регистрацэм пхыкIын хуейщ 2026 гъэм и гъатхэпэм и I-м фIимышу. 
Зи щIы кIапэм унэ тезыщIыхь фермерхэм я лэжьыгъэри (Iэщ гъэхъуным къыщыщIэдзауэ бжьэмкIэ иухыжу) абдежым къыщрахьэлIэн хуейуэ хабзэм къегъэув. Фермер хозяйствэхэм я мылъкум хиубыдэ апхуэдэ псэуалъэхэр зытет щIыр къэбухъуреихь е пыбгъэщхьэхукI хъунукъым.