Энергетикхэм я махуэшхуэщ

Зэманым къыдэкIуэ Iуэхухэм IупщIу къагъэлъэгъуащ а IэщIагъэм ирилажьэхэм къабгъэдэхуэ  къалэнхэр зэрыиныр.
Техникэр къызэрагъэсэбэпым, щIыуэпсым и къэхъукъащIэхэм япыщIауэ къыкъуэкI гугъуехьхэр абыхэм езыхэм я  узыншагъэм щымысхьыжу къызэранэкI икIи цIыхухэм нэхумрэ  хуабэмрэ къыхузэрагъэпэщыж. Иджыблагъэ жэщми махуэми гугъуехьышхуэхэм хэту икIи псэемыблэжу лажьэурэ, энергетикхэм зэман кIэщIым энергие системэр зэтегъэувэжынымкIэ республикэм щызэфIагъэкIахэр абы и щыхьэтщ.
ЩIыналъэм и энергетикэр зэтегъэувэнымрэ абы зегъэужьынымрэ къыгуэхыпIэ имыIэу пыщIауэ щытащ ди республикэр индустриализацэ щIыным. IэщIагъэлIхэм я иджырей щIэблэр ирогушхуэ 20-нэ  лIэщIыгъуэм и 20-30-нэ гъэ жыжьэхэм мы IэнатIэм щылэжьа япэ гупхэм, ГОЭРЛО-м и  планыр Къэбэрдей-Балъкъэрым щызыгъэзэщIахэм, я хабзэхэмрэ абыхэм  зэфIагъэкIахэмрэ. А лъэхъэнэм электрокъарур япэу ди къуажэхэм зэрыдашам цIыхухэм я псэукIэр куууэ зэрихъуэкIащ. Ди щIыналъэм щызэтеуващ экономикэм зегъэужьынымрэ социальнэ гугъуехьхэр дэгъэкIынымрэ лъабжьэ хуэхъуа энергосистемэ.
Энергетикэм  ди зэманми зиужь зэпытщ. Иужьрей илъэсхэм а IэнатIэр егугъуу къагъэщIэрэщIэж, иджырей технологиехэр къыщагъэсэбэп,  лъэщагъыщIэхэр щызэтрагъэувэ. Ди республикэм гидроэлектростанц мыину 8 щыIэщ, Шэрэдж ГЭС мыиныр ящI, Акъбащ Ипщэ электростанцым и проектыр ягъэхьэзыр. А псори сэбэп мэхъу цIыхухэр, псом хуэмыдэу бгылъэ щIыпIэхэм щыIэ жылагъуэ пхыдзахэр, электрокъарукIэ къызрызэрагъэпэщыр егъэфIэкIуэнымкIэ.
Энергетикэ комплексым и лэжьакIуэхэмрэ абы и ветеранхэмрэ я махуэшхуэмкIэ-Энергетикэм и махуэмкIэ си  гуапэу сынывохъуэхъу. ФIыщIэ фхузощI IэкIуэлъэкIуагъэ зэрыфхэлъым, хьэлэлу икIи фызыпэрыт Iуэхум фыхуэпэжу фызэрылажьэм папщIэ. Узыншагъэ быдэ, ехъулIэныгъэ, фIыгъуэ фиIэну сынывохъуэхъу.
Фи пащхьэ  къит къалэн инхэр гъэзэщIэным сыт  щыгъуи хуэдэу жэуаплыныгъэшхуэ фхэлъу фызэрыбгъэдыхьэнум,  Къэбэрдей-Балъкъэрым и энергетикэ комплексыр зэрылажьэр адэкIи егъэфIэкIуэным фызэрыхущIэкъунум шэч къытесхьэркъым.