«Мир» картэм и Iэмалхэм зыщрагъэужь

КъБР-м и Правительствэм и унафэщI Мусуков Алий лэжьыгъэ IуэхукIэ IущIащ «Уасэхэр зэрыщIат лъэпкъ системэ картэхэр» АО-м и генеральнэ директор Комлев Владимир. А зэIущIэм хэтащ КъБР-м и Правительствэм и УнафэщIым и япэ къуэдзэ Къуныжь МуIэед.

Урысей Банкым и отделенэу КъБР-м щиIэм и унафэщI къалэныр пIалъэкIэ зыгъэзащIэ Къалэ Аслъэн, КъБР-м бжыгъэр зи лъабжьэ зыужьыныгъэмкIэ и министр Ащхъуэт Ислъам, КъБР-м курортхэмрэ туризмэмкIэ и министр  ЩоджэнцIыкIу Мурат, АО «НСПК»-м и бжыгъэхэмрэ технологиехэмрэ зи лъабжьэ зыужьыныгъэмкIэ отделым и унафэщI Точиловэ Мария, «Уасэхэр зэрыщIат лъэпкъ картэхэм заужьынымкIэ Ищхъэрэ къэрал Урысей банкым и отделым и унафэщI Шишкин Евгений сымэ.

ЗэIущIэм щытепсэлъыхьащ «Iуащхьэмахуэ турист - рекрационнэ комплексым» уасэхэр зэрыщат IэмалыщIэхэр къэгъэсэбэпыным теухуауэ лэжьыпхъэхэм.

«Уасэхэр зэрыщIат лъэпкъ системэ  картэхэр» АО-м и генеральнэ директор Комлев Владимир зэIущIэм къызэрырихьэлIам и фIыгъэкIэ «Мир» картэм и Iэмалхэм теухуа презентацэ гъэлъэгъуэныгъэ ирагъэкIуэкIащ. ЗыплъыхьакIуэ къакIуэхэм тыншу «Мир» картэр къагъэсэбэпыфынущ, картэхэр, апхуэдэуи, зыми жьэхэмыуэу, телефоным трагъэтха картэ программэхэри къахуэгъэсэбэпынущ. Абы цIыхухэм уасэ тыным текIуадэ зэманыр игъэмэщIэнущ. «Мир» картэм и технологие Iэмалхэм дяпэкIи заужьынущ, курортым къакIуэ хьэщIэхэми ар къахуэщхьэпэнущ»-къыхигъэщащ Комлевым.

Фигу къэдгъэкIыжынщи, КъБР-м и Iэтащхьэ КIуэкIуэ Казбек финанс хуэIуэхущIэхэр къэгъэсэбэпыным, лъэпкъ платеж Iэмалхэр егъэфIэкIуэным теухуауэ «Уасэхэр зэрыщIат лъэпкъ системэ  картэхэр» АО-м и генеральнэ директор Комлев Владимир, Урысейм и Ищхъэрэ Къэрал Управленэм и банкым и унафэщIым яхуэзауэ щытащ. - «ДэркIэ бжыгъэр зи лъабжьэ зыужьыныгъэхэр нэхъыщхьэ дыдэу зэманым къытхуигъэувхэм ящыщщ. Финанс зэпыщIэныгъэ и лъэныкъуэкIэ ди къэралым, апхуэдэуи, хамэ къэрал банкхэм дадэлэжьэныр, ди цIыхухэм я псэукIэр едгъэфIэкIуэныр УФ-м и Президентым къытхуигъэува къалэнхэм ящыщщ» - къыхигъэщащ КIуэкIуэ Казбек.

ЗэIущIэм хэтахэм къыхагъэщащ «Мир» картэм и IэмалыщIэхэр къагъэсэбэпкIэрэ, Iуащхьэмахуэ и бгы лыжэ къежэхыпIэхэм уасэхэр зэрыщат щIыкIэхэр егъэфIэкIуэн папщIэ, зыхуагъэувжа къалэн псори ягъэзэщIэну.