«Адыгэ псалъэ» газетым и щIэджыкIакIуэхэр зэрыщыгъуазэщи, Къэбэрдей-Балъкъэрым и Iэтащхьэ КIуэкIуэ Казбек «ХъуэпсапIэхэм я псейкIэ» зэджэ псапащIэ Iуэхум ди хэгъэгум щрижэрдэмщIакIуэщ. А гукъэкIыр абы даIыгъащ Бахъсэн щIыналъэм щIыпIэ унафэр щызехьэнымкIэ и IуэхущIапIэм и унафэщIхэми.
Зеикъуэ (ХьэтIохъущыкъуей Ипщэ) къуажэм щыщ Бырмамыт Алан и хъуэпсапIэщ автомашинэхэм елэжь слесарь-IэщIагъэлI хъуну, абыхэм я дагъуэхэр къихутэу, щыщIэныгъэ яIэхэр зэригъэзэхуэжу, зэпкърих-зэпкърилъхьэу лэжьэну. А Iуэхугъуэхэр нэсу къызэгъэпэща хъун папщIэ, щIалэр щIэхъуэпсырт автомашинэхэм узэрелэжь хъун слесарь Iэмэпсымэхэм. Бырмамыт Алан зэхъуапсэ Iэмэпсымэхэр иджыблагъэ Бахъсэн щIыналъэм щIыпIэ унафэр щызехьэнымкIэ и IуэхущIапIэм и Iэтащхьэ Балъкъыз Артур къыхуищIащ – щIалэм и цIэмрэ зыхуеймрэ зэрыт тхылъыр унафэщIым псейм къыпихащ. Зи насып къэкIуэгъуэ щIалэм и гуращэр къызэрехъулIам дэри дыщогуфIыкI, цIыхум и IэкIэ къилэжьыжам нэхъыфI щыIэу къыщIэкIынкъыми, зыщIэхъуэпс IэщIагъэм гуфIэгъуэ куэд къыдэкIуэу псэуну ди гуапэщ.
Абы къищынэмыщIауэ, Балъкъыз Артур иджыри «ХъуэпсапIэхэм я псейм» тхылъих къыпихащ, Къэбэрдей-Балъкъэрым и щIыналъэ зэмылIэужьыгъуэхэм щыщ ныбжьыщIэхэм я хъуэпсапIэхэри нахуэ яхуищIащ. ЦIыкIухэм ящыщу хэти сурэт зытритхыхь хъун пхъэбгъу хуейт, хэти спорт вакъэ зыпылъ щыгъын зэпыт къыщIэлъэIурт, хэти баскетбол Iэмэпсымэхэм щIэхъуэпсырт.
«ХъуэпсапIэхэм я псейкIэ» зэджэ псапащIэ хабзэ дахэр 20I8 гъэм УФ-м и Президент Путин Владимир и жэрдэмкIэ къызэрагъэпэщауэ щытащ. ЦIыхум и гур къыдэшеиныр, и гугъапIэхэр мыгъэужьыхыныр, уи Iэ къихьэм, пхузэфIэкIым хуэдиз хуэпщIэныр – гур хэзыгъахъуэ Iуэхугъуэщ, гуфIэгъуэшхуэщ, псапэщ.
«Дызытет дунейр зэрыдахэм хуэдэу, дгъэгуфIэ сабийхэм я гум къигъэщI дунейр дахэщ. А дахагъэм гъуэгу етын хуейщ, гъащIэм къыхэшэн хуейщ. Телъыджэлажьэхэр зэрыщыIэр зи фIэщ хъу сабийм, ар зэрызэщIэнумкIи фIэщхъуныгъэ етын хуейуэ балигъхэм хьэкъ диIэщ. Сэ къыслъысу сабий гуфIэу щыслъагъукIэ, си гур хохъуэ, дыщIэпсэум и мыхьэнэр зыхэсщIэу сохъу», – жиIащ Балъкъыз Артур.
