Жэуаплыныгъэ зыхэлъ цIыхубз

2023 гъэм щIышылэм и 20-м илъэс 220-рэ ирокъу Урысей МВД-м и IэнатIэ нэхъыжьхэм я зыр – къулыкъущIапIэм и лэжьыгъэр зэкIэлъыгъэкIуэнымкIэ къулыкъур. 1803 гъэм министерствэм канцелярия къыщызэрагъэпэщауэ щытащ, а Iуэхум пыщIауэ. Абы зэреджэм зэхъуэкIыныгъэ мызэ-мытIэу игъуэтащ лIэщIыгъуитIым къриубыдэу, ауэ и къалэн нэхъыщхьэр - МВД-м и управленэр дэфтэрхэмкIэ, зыхуей нэгъуэщI тхылъхэмкIэ къызэгъэпэщыныр - нобэми тэмэму егъэзащIэ. Сыт хуэдэ зэхъуэкIыныгъэ, зыужьыныгъэ имыIами, министерствэм и IэнатIэ псоми я лэжьыгъэр зэпызыщIэу къэнэжащ. 
Апхуэдэ пщэрылъхэр екIуу зыгъэзащIэ лэжьакIуэщ Урысей МВД-м Тэрч районым щиIэ къудамэм и инспектор нэхъыщIэ, къэрал кIуэцI къулыкъум и сержант нэхъыжь Мирзоевэ Сюзанэ.
Къэрал кIуэцI IуэхухэмкIэ органхэм Сюзанэ хыхьащ 2011 гъэм и накъыгъэм - плъыр-пост къулыкъум и къудамэм лэжьэн щыщIидзащ. Зэман дэкIри, къудамэм и унафэщIым гу лъитащ абы жэрдэм, жэуаплыныгъэ зэрыхэлъым, лэжьыгъэм зэрегугъум. Илъэс еплIанэ хъуауэ Мирзоевэ Сюзанэ ехъулIэныгъэ иIэу зэфIегъэкI IэнатIэм и дэфтэрхэр щыуагъэншэу, тэмэму зэIэпахыным хуэгъэза лэжьыгъэр. 
- Ди лэжьыгъэм къегъэув зэщIэкъуауэ, набдзэгубдзаплъэу дыщытыныр, цIыхухэм уадэлэжьэфыныр. ИпэжыпIэкIэ апхуэдэ хьэлхэр дэIэпыкъуэгъу къысхуохъу фIыуэ слъагъу си лэжьыгъэм сехъулIэнымкIэ, - жеIэ сержант нэхъыжьым. 
Я махуэшхуэмкIэ Сюзанэ йохъуэхъу и лэжьэгъухэм, узыншагъэ, насып, ехъулIэныгъэ, зэIузэпэщыгъэ яIэну, я IэщIагъэм хагъахъэу, дэрэжэгъуэ яIэу я лэжьыгъэм пэрытыну.