Дэнэ кIуа ди абдж къабзэхэр?

ЦIыхум сыт щыгъуи гулъытэ лей хуищIу къокIуэкI унагъуэхэм щызэрахьэ хьэкъущыкъухэм, абджыпсхэм, хьэпшып цIыкIуфэкIухэм. Дыхуей дыхуэмейми, абыхэм я къыхэхыкIэ екIур унагъуэм и гъуджэу сыт щыгъуи щытащ икIи щытынущ. Иджырей зэманым мардэ лъагэхэм я щапхъэм уимыхьэжыфынри хэлъщ, фIагъ зыбгъэдэлъ хьэпшыпхэр мащIэ зэрыхъуар нэхъ хэмылъми, ауэ а къэна мащIэр екIуу, уи псэукIэмрэ уи унагъуэм щытепщэ зэхэщIыкIым хуэкIуэу къыхэпхыным зыри зэран къыхуэхъуркъым, ауэ абы папщIэ фIымрэ Iеймрэ пхузэхэгъэкIыу ущытын хуейщ.

Щхьэрыжэщ къэрал лъэлъэжыгъуэм къыдэкIуа хьэпшып мыфэмыц куэдым цIыхур зэрырагъэсар, нэхъыфI щыIауэ ямыщIэжу. Хьэпшыпым гъэщIэрэщIэкIэ ямылей ирамытыфми, Совет лъэхъэнэм къыщIагъэкIыу щыта хьэкъущыкъухэмрэ абджыпсхэмрэ пэхъун къэгъуэтыгъуейт. Хэтхэ я стIолыщхьэ зытемытар жызум къудамэшхуэр зи джабэм хэщIыхьа абджыпс джырафинэ удзыфэ - щIыху дахэхэр, лэдэх зиIэ стаканхэр. Ахэр хэти къыхуэщэху жылагъуэ хьэкъущыкъут. Ди сабиигъуэм къыддекIуэкIа апхуэдэ зы ди унагъуэм къинащи, сыхуэсакъыу зызохьэ, абы и дахагъыу ящIу щытар сеплъыху згъэщIагъуэу.

Нобэ ди сату щIапIэхэр къакъутэ абджыпс хьэкъущыкъу зэмылIэужьыгъуэхэм. Иджырей технологиехэм я фIыгъэкIэ абыхэм плъыфэрэ теплъэу ирамыт къэгъуэтыгъуейщ, пудуи пхужыIэнукъым ахэр. Ауэ къэпщтэн фIэкIа хэмылъу, зэуэ Iэм къещIэ жыжьэуи зэрымыабдж къабзэр. Сыт хуэдэу мыгъэщIэрэщIами, «советскэ» абджым и лыдыр бгъуэтыжынукъым, къызыхащIыкIри гурыIуэгъуей хъунущ - нобэ дэни хуиту химие пкъыгъуэхэр щызэхалъхьэфынущ. Пащтыхь зэман лъандэрэ зы мардэм тету лажьэу щыта Урысей фарфор завод цIэрыIуэхэм я дамыгъэ дызэсахэм (хы тхьэрыкъуэхэм, тхьэрыкъуэхэм) я пIэм къиуващ Китаим япэу къыIэрыхьэ пластикэмрэ абджымрэ, щIэжьыхьыну хунэмыса ятIэ гъуэжьым псынщIэрыщIэу къыхищIыкI хьэкъущыкъу къомыр. Мыбдежми къэлъытапхъэщ, Китаим и фарфор хьэпшыпхэр нэхъыфI дыдэхэм хабжэу къызэрекIуэкIар. Ауэ хьэпшып пудыжьым зэщIищта дунейм ахэри къыхэбгъуэтэжыныр гугъущ. 

Куэдым я жагъуэ хъуащ, Швед къэралыгъуэм къыщежьэу дуней псор зэщIэзыщта «IKEA» тыкуэнхэр ди къэралым зэрыщызэхуащIыжар; пхъэ къабзэм, псом хуэмыдэу уэздыгъейм, абы къыхищIыкI унэлъащIэ къызэрыгуэкIхэм хуэдэ къэгъуэтыгъуейщ, цIыху куэдым я гу нэс пасэрей унэлъащIэхэм я теплъэр иратыжри, яфIэфIу къащэху, ауэ и хьэкъущыкъухэм абдж къабзэм къыхэщIыкIа яхэтакъым, абдж-пластикэ зэхэлъ мыхъумэ. Псалъэм папщIэ, и фэм удихьэхыу къэпщэхуа джырафинэ щIыху цIыкIум псы пщтыр зэрынэсу, щIыхуу уи гугъа абджым шхэпс щхъуантIэр зэрыIыгъыу къытелъэфырти, абдж-пластик фагъуэр къыщIэщыжырт. Иджы Урысейм щащI хьэпшыпхэм хагъэхъуэжыну, гъуэгу ягъуэтыжыну жаIэ хъуащи, цIыхухэр нэхъ зыхуейхэм гулъытэ ягъуэтыжыну дыщыгугъынщ.