Иджырей Iэмалхэр къагъэсэбэп

Гум екIуалIэ лъынтхуэхэмрэ къуэпсхэмрэ лъы тэмэму зэралъэмыIэсым къыхэкIыу, цIыхур инфаркт мэхъу. Апхуэдэ сымаджэхэм икIэщIыпIэкIэ дэIэпыкъуэгъу ямыгъуэтмэ, операцэ ямыщIмэ, лIэнущ. Иужьрей IэмалыщIэхэр къагъэсэбэпурэ, апхуэдэ операцэ хьэлъэхэр гущхьэм щрагъэкIуэкI КъБР-м и Кардиологие диспансерым.

Иджыблагъэ кардиологие сымаджэщым нагъэсат цIыхухъум и бгъэгур уз гуащIэм иубыдауэ. Дохутырхэм зэуэ къахутащ абы инфаркт зэриIэр икIи икIэщIыпIэкIэ операцэ щIын хуейуэ ягъэуващ. Гу лъытапхъэщи, цIыхум и бгъэгур зэгуамыхыу, лъынтхуэм иIэбэкIэрэ апхуэдэ узыфэхэр дакъикъэ бжыгъэм егъэужьыхыф нобэрей медицинэм. Апхуэдэу, мы сымаджэми и лъынтхуэмкIэ иIэбэри, и гум тридза фIыцIагъэм деж гъущI хъар хагъэуващ, лъыр хуиту ирызекIуэн папщIэ.

ЦIыхур ажалым къезыгъэл а операцэр сыхьэт ныкъуэкIэ екIуэкIыу аращ икIи сымаджэр щIэх дыдэ къызэфIоувэж. КъищынэмыщIауэ, операцэр зэрекIуэкIым благъэхэр кIэлъыплъыфынущ, абы видео трахри. Сымаджэр ягъэмэхыркъым, ягъэундыращхъуэркъым. Абы къыдэкIуэу, реаниматологрэ лъынтхуэм елэжь хирургитIрэ Iэгъуэблагъэм хьэзыру итщ.

КъБР-м и Кардиодиспансерым иужьрей зэманым къыздихьа IэмалыщIэхэм хуиту ирилажьэ дохутыр Iэзэхэр щыкуэдщ. Мыпхуэдэ операцэу 1300-рэ ирагъэкIуэкIащ абыхэм 2022 гъэм. КъищынэмыщIауэ, нэхъыбэрэ операцэ ящI хъуащ лышх зэуз сымаджэхэр. Сыт щхьэкIэ жыпIэмэ, ди щIыналъэ сымаджэщхэр къызэгъэпэщащ апхуэдэ узыфэ шынагъуэхэм зэрыпэщIэт IэмэпсымэхэмкIэ.

Псалъэм къыдэкIуэу: Кардиодиспансерым аптекэ къыщызэIуахыну жаIэ, инфаркт, инсульт зиIахэм, операцэ ящIахэм пщIэншэу хущхъуэ къыщрату.

Фырэ Анфисэ.