Наркотикым щахъумэу

КъБР-м щыIэ МВД-м Наркотикхэр зэрызэбграгъэхым кIэлъыплъынымкIэ и управленэм и лэжьакIуэхэмрэ Налшык къалэм щыIэ УМВД-м балигъ мыхъуахэм я IуэхухэмкIэ и инспекторхэмрэ «Урысейм и сабийхэр-2023» профилактикэ Iуэхум и япэ Iыхьэм хыхьэу яхуэзащ Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым хамэ къэралхэм къикIауэ щеджэ студентхэм.
ЗэIущIэр теухуат щIалэгъуалэр наркотикхэкIхэр зэхьэлIэным пэIэщIэ щIыным, наркотикхэкIхэмрэ акъылыр зыгъэутхъуэ пкъыгъуэхэмрэ хабзэншагъэкIэ игъэкIыным щIалэгъуалэр щыхашэ къэхъумэ, ар къыщIэгъэщыным, апхуэдэ Iуэхум хэпщIамэ, уголовнэ жэуап зэрахьым жылагъуэр щыгъэгъуэзэным.
Налшык къалэм щыIэ УМВД-м и полицэ къудамэ №1-м балигъ мыхъуахэм я IуэхухэмкIэ и инспектор, полицэм и лейтенант нэхъыжь ТыIэщ Джэримэс студентхэм ягуригъэIуащ наркотикхэкIхэм цIыхухэр дегъэхьэхынымкIэ къагъэсэбэп Iэмалхэм куэд зэригъэщхьэрыуэр.
 «ТегъэщIапIэ Iэмал» жылагъуэ организацэм и унафэщI Къарэ Ратмир тепсэлъыхьащ наркотикхэкIхэмрэ акъылыр зыгъэутхъуэ пкъыгъуэхэмрэ зэхьэлIэным узыхуишэм.
- ГъащIэ узыншэ ехьэкIыным цIыхур щхьэхуитщ ещI, и щхьэ и унафэ трищIыхьыжыну, и гъащIэр езым иунэтIыжыну Iэмал кърет , - къыхагъэщащ абыхэм.
ХьэщIэхэм къызэхуэсахэм жраIащ республикэм «линэ пщтыр» телефон зэрыщылажьэр, наркотикхэкIхэмрэ акъылыр зыгъэутхъуэ пкъыгъуэхэмрэ зэрырагъэкIым теухуа хъыбарыр жэщи-махуи абыкIэ ебгъащIэ зэрыхъунур.
ЗэIущIэм и кIэухыу студентхэр зыщIэупщIахэм жэуап иратащ, мыпхуэдэ Iуэхухэр щIэх-щIэхыурэ зэрегъэкIуэкIыпхъэр къыхагъэщащ, апхуэдэуи Iуэхур даIыгъащ, «Наркотикхэм драбийщ!» къыхуеджэныгъэр къызытещ тхылъымпIэхэр яIыгъыу сурэт зытрагъэхри.