КъБР-м и Iэтащхьэр хагъэхьэ

Урысей Федерацэм и Президент Путин Владимир Iэ щIидзащ УФ-м и Президентым и деж щылажьэу ЩIыпIэ самоуправленэм зегъэужьынымкIэ совет зэхэшэным, абы и президиумым хэтынухэр убзыхуным теухуа унафэм. Дэфтэрыр къралъхьащ хабзэм теухуа хъыбарыщIэхэмкIэ интернет-порталым.

Советым и тхьэмадэщ къэралым и Iэтащхьэр, абы и къуэ­дзэщ УФ-м и Правительствэм и УнафэщI Мишустин Михаил. Ар федеральнэ, щIыналъэ, муниципальнэ Iыхьэу зэщхьэщыхауэ щытынущ. 
Советым и президиумым и тхьэмадэ къулыкъур ирихьэкIынущ Мишустин Михаил, абы и къуэдзэу ягъэуващ УФ-м и Президентым и Администрацэм и унафэщIым и къуэдзэ Кириенкэ Сергей.
Унафэм къызэрыщыгъэлъэгъуамкIэ, Советым хагъэхьащ ­КъБР-м и Iэтащхьэ КIуэкIуэ Казбек. ЩIэуэ абы хэтхэм ящыщщ УФ-м и Правительствэм и УнафэщIым и къуэдзэ, абы и Аппа­ратым и унафэщI Григоренкэ Дмитрий, «Урысейр Iэмал зэ­мылIэужьыгъуэхэм я хэкущ» АНО-м и директор, РАНХиГС-м и ­ректорым и къалэнхэр зыгъэзащIэ Комиссаров Алексей, УФ-м мэкъумэш хозяйствэмкIэ и министр Патрушев Дмитрий.
Советым и щIыналъэ, муниципальнэ къудамэхэм хагъэхьащ Урысей Федерацэм и щIыналъэщIэхэр.
УФ-м и Президентым нобэ иригъэкIуэкIынущ щIэуэ зэхашэжа, ЩIыпIэ самоуправленэм зегъэужьынымкIэ советым и япэ зэIущIэр.