НэхъыфIхэм Москва къапоплъэ

Къэбэрдей-Балъкъэрым щыIэ МВД-м хэIущIыIу ищIащ «Полицейский дядя Стёпа» фIэщыгъэм щIэту ирагъэкIуэкIа ­урысейпсо зэхьэзэхуэм и щIыналъэ зэпеуэм кърикIуахэр.

Республикэ зэхьэзэхуэм щытекIуахэм Къэбэрдей-Балъкъэрым къыбгъэдэкIыу къэ­ралпсо зэпеуэм я зэфIэкI щагъэлъэгъуэнущ. КъБР-м щыIэ МВД-м и Жылагъуэ советым и нэIэм щIэту гъэ къэс ирагъэкIуэкI зэхьэзэ­-хуэм хэтхэр, я ныбжьым елъытауэ, гупищу ­гуэшащ: илъэси 6 - 8, 9 - 11, 12 - 14 хъухэр, жиIэу.
ЦIыкIухэм лэжьыгъэу иратат, хабзэхъумэ ­IэнатIэхэм къулыкъу щызыщIэхэм я лэжьыгъэм ехьэлIа Iэмэпсымэхэр, хьэпшыпхэр, езыхэр зэрыхуейуэ къыхахыу, я IэкIэ ящIыну. Зэхьэзэхуэм хэтыну хуейуэ республикэм и щIыналъэхэм сабий 20 къахэкIат. Абыхэм я ­IэдакъэщIэкIхэр къэзыпщытахэм яхэтащ министерствэм хъыбарыщIэхэмрэ жылагъуэ зэпыщIэныгъэхэмкIэ и къудамэм и унафэщI, къэрал кIуэцI къулыкъум и подполковник ­Ткаченкэ Ольгэ, МВД-м и Жылагъуэ советым къыбгъэдэкIыу Токъубей Сюзаннэ, ОВД-м и ветеранхэм я щIыналъэ жылагъуэ зэгухьэныгъэм и лIыкIуэ Жабоев Жэбрэил, хабзэхъумэ IэнатIэхэм я лэжьакIуэхэр.
Илъэси 6 - 8 зи ныбжьхэм я деж бжьыпэр щиубыдащ Бахъсэн къалэм дэт курыт еджапIэ №2-м и 2-нэ классым щеджэ Къэзэр ­Асильдарэ.
Илъэси 9 - 11, 12 - 14 хъухэм я гупым ящыщу нэхъыфIу жюрим къилъытар Тэрч къалэм дэт Сабий творчествэмкIэ центрым и гъэсэн Щхьэгуэш Адисэрэ Май къалэм щыIэ курыт школ №5-м щеджэ Тхьэмокъуэ Дамиррэ я ­IэдакъэщIэкIхэрщ.
Лэжьыгъэхэм яхэбдзын яхэмылъу, псори гъэщIэгъуэн защIэт. Пластилиныр, абджыр, пхъэр, пластикыр, тхылъымпIэ Iувыр, щэкIхэр - а псори Iэрыхуэу къыщагъэсэбэпат цIыкIухэм я лэжьыгъэхэм. Зэпеуэм щытекIуахэр, зэ­рыжытIащи, Москва щекIуэкIыну творческэ зэхьэзэхуэм яшэнущ, ди республикэм къыбгъэдэкIыу.