Лъэмыжым йолэжь

Бахъсэн щIыналъэ

         «ГъуэгуфI шынагъуэншэхэр» лъэпкъ Iуэхум къыщыгъэлъэгъуахэр ягъэзэщIэным ипкъ иткIэ, мы зэманым иужь ихьащ Прохладнэ-Iуащхьэмахуэ автомобиль гъуэгум хиубыдэу Бахъсэныпс зэрызэпрыкI лъэмыжыр зэгъэпэщыжыным.

         Километр къызэщIэзыубыдэ щIыпIэм зэпещIэ Дыгулыбгъуей къуажэмрэ Бахъсэн къалэ округымрэ. Апхуэдэуи а гъуэгур къагъэсэбэп республикэм и щыхьэрым кIуэ машинэ куэдым. Иджыпсту гъуэгум и лэжьакIуэхэр зи ужь итыр лъэмыжым и зэпылъыпIэхэр зыхуей хуэгъэзэжынырщ, нэхъ быдэу, шынагъуэншэу щытын хуэдэу.

         «ЗэпылъыпIэхэм мыхьэнэшхуэ иIэщ лъэмыжхэр щаухуэкIэ. Ухуэныгъэр и пIэм имыкIыу нэхъыбэрэ щытыныр ахэращ зэлъытар», - къыхегъэщ Iуэхум елэжьхэм я куратор Агаев Марат.

         Мы зэманым лъэмыжым бетон трагъэжыхьащ, гъуэгубгъухэр IуащIыхьащ, лъэс зекIуапIэхэм асфальт тралъхьащ, къэзыгъэнэху Iэмэпсымэхэри зэрахъуэкIащ.

         АдэкIэ IэщIагъэлIхэм асфалътыр тIууащIэу тралъхьэнущ, гъуэгу дамыгъэхэр фIадзэнущ. Iуэхухэр псори гъэмахуэм зэфIагъэкIыну я мурадщ.

КЪАНЩАУЭ Мэлычыпхъу.