Шынагъуэншагъэм и шэсыпIэхэр

Къэбэрдей-Балъкъэр Республикэм и Iэтащхьэ КIуэкIуэ Казбек иригъэкIуэкIащ КъБР-м Хабзэм къемы­зэгъхэр къэмыгъэхъунымкIэ зэпы­мыу­уэ лажьэ зэзыгъэуIу зэхыхьэм­рэ республикэм Экономикэ, жы­ла­гъуэ шынагъуэншагъэмкIэ и советымрэ я зэIущIэ. 

Абы и лэжьыгъэм хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, федеральнэ инспектор нэхъыщхьэу КъБР-м щыIэ Мэкъуауэ Тимур, министрхэр, хабзэхъумэ, къэпщытакIуэ-кIэлъыплъакIуэ IэнатIэхэм, щIыпIэ самоуправленэ­хэм, муниципалитетхэм я унафэщI­хэр.
Тутнакъэщым къикIыжахэр гъащIэм хэгъэзэгъэжынымкIэ хабзэхъу­мэ IэнатIэхэм, къэрал къулыкъущIапIэхэм, щIыпIэ самоуправленэхэм    ир­а­гъэкIуэкI лэжьыгъэхэм тепсэлъы­хьащ УФ-м и УФСИН-м и къудамэу ­КъБР-м щыIэм и унафэщIым и къалэнхэр пIалъэкIэ зыгъэзащIэ Ковалёв Михаил, КъБР-м щыIэ МВД-м и ми­нистр Павлов Василий, республикэм лэжьыгъэмрэ цIыхухэм псэуныгъэм теухуауэ къащхьэщыжынымкIэ и министр Асанов Алим, Шэрэдж муниципальнэ щIыналъэм и уна­фэщI Кульбаев Алан сымэ.
Лъэпкъхэм яку зэныкъуэкъу къы­дэзылъхьэну хущIэкъу, хамэ къэралхэм я тIасхъэщIэх IэнатIэхэм я нэIэм щIэту лажьэ дунейпсо жылагъуэ зэгухьэныгъэхэм ирагъэкIуэкI Iуэху мыщ­хьэпэхэм япэщIэтынымкIэ ялэжь­­хэм я гугъу ищIащ КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзор.
Хабзэхъумэ  IэнатIэхэм  я лэжьыгъэм щытепсэлъыхьым къыхагъэщащ «Шынагъуэншэ икIи фIагъ зиIэ автомобиль  гъуэгухэр», «ПсэупIэхэмрэ къалэ уэрамхэмрэ», «Экология» лъэпкъ проектхэр гъэзэщIа зэрыхъур.
ЗэIущIэр зэрекIуэкIам теухуауэ унафэ пыухыкIахэр къащтащ икIи къы­хагъэщащ Iулъхьэ тыным пэ­щIэ­тынымкIэ ирагъэкIуэкI Iуэхур щIагъэ­хуэбжьэну, тутнакъэщым исахэр гъащIэм хэгъэзэгъэжыным хуэунэтIа лэ­жьыгъэхэр ирагъэфIэкIуэну.