Дэлэным далъхьэр лъагъуныгъэщ

 «Зэхьэзэхуэр унэтIыныгъэ зыбжанэу зэщхьэщыхат. Ди гупым щыщ пщафIитIыр «Лы» зэпеуэм и къудамитIми щытекIуащ, - игу къегъэкIыж Хъадижэт. - КIэух зэхьэзэхуэм лъэпкъ шхыныгъуэ къыщыгъэлъэгъуэн хуейти, къэпщытакIуэхэм ди чепалгашым нэхърэ нэхъ IэфI яIумыхуауэ жаIащ». 

 Хъэдижэт зэхьэзэхуэм зэрыхэтар пщафIэ къудейуэкъым, атIэ «пщIэ зиIэ къэпщытакIуэ» IэнатIэри и пщэ къыдалъхьат. Шэшэн цIыхубзыр къэрал 36-рэ зыхэт ПщафIэхэм я дунейпсо зэгухьэныгъэм и пашэщ, 28-рэ чемпион хъуауэ. Дауи, езым и гупым и зэфIэкIыр къэзыпщытар нэгъуэщIхэрщ, итIани, къикIуэтыну зимымурад Хъадижэт текIуэныгъэншэу къызэримыгъэзэжынур ищIэрт. 

 Зэхьэзэхуэм хэтын папщIэ, Мовлатовэм Кавказ Ищхъэрэм пщэфIэнкIэ нэхъ Iэзэу исхэр зэхуишэсат. Зэпеуэм хуагъэхьэзырар шэшэнхэм пасэ зэман лъандэрэ япщэфI шхыныгъуэхэрщ. Шэшэным икIа гупым я гъусащ «Чабан» IуэхущIапIэри. 2023 гъэм и гъатхэпэм Мовлатовэр «Чабан»-м къыщIигъэкI гъэшхэкIхэр зыгъэлъагъуэ унафэщI ящIащ. Ливаным щекIуэкIа зэхьэзэхуэр а къудамитIым япэу здащIа Iуэхущ. 

 «Ди лъэпкъ шхыныгъуэхэр ди щхьэр лъагэу щIэтIэт хъугъуэфIыгъуэщ, ди щэнхабзэм и псэщ, ди щIыпIэр къызэрацIыхуж ерыскъыщ. Ахэр хъумэныр си къалэн лъапIэу къызолъытэ. «Чабан» IуэхущIапIэр а мурадымкIэ къызэрыттехуэри си гуапэщ», - жиIащ Хъадижэт. 

 Шэшэн зауэр екIуэкIыху Къэрэшей-Шэрджэсым щыпсэуа Мовлатовэм пщафIэ зэрыхъуа щIыкIэр удихьэхыу къеIуэтэж: 

 «Сэ IэщIагъэкIэ сыюристщ. Си иджырей IэщIагъэм сыхуэкIуэху, нотариусу сылэжьащ. ПщафIэ сызэрыхъуар зэрымыщIэ дыдэущ. Ди унагъуэр Грознэм дыкъэIэпхъуэжати, зауэм зэтрикъута нотариальнэ IуэхущIапIэхэм зыщIэсынышхуи яIэтэкъым, тыкуэн цIыкIухэм щIэгуауэ апхуэдэти, а IэщIагъэм срилэжьэн здэжакъым. 

 Зэгуэр, си щхьэгъусэмрэ сэрэ фIыуэ дызэдэуауэ, сыкъогубжьри, сыхурикъун папщIэ, лэжьапIэ къэзгъуэтыну мурад сощI. Си къуэр газетыхьэ согъакIуэ, къещэху, сэри хъыбарегъащIэхэр щIэспщытыкIын щIызодзэ. Арати, ди Iэгъуэблагъэм ит ресторан гуэрым пщафIэ къызэрилъыхъуэр си нэм къыфIэнащ. СызэрыцIыкIурэ сыпщэфIэн сфIэфIт. Зэрыхъу хъунщ жызоIэри, сожьэ. «ПщафIэу зыщIыпIэ ущылэжьа?» - жаIэу къыщызэупщIым, пцIы тIэкIу супсащ, зыкъезгъэщтэн щхьэкIэ. Сыщылэжьатэкъым зыщIыпIи абы ипэкIэ. МазитI дэкIа нэужь, пщафIэ нэхъыщхьэ сащIащ. Иджыри илъэс ныкъуэ дэкIри, «бренд-повар» сыхъуащ. АпхуэдизкIэ сыдихьэхат си лэжьыгъэми, ипэрей илъэсищым зыгъэпсэхугъуэ махуэ къеIысхыххакъым». 

 Хъадижэт игу хэхъуэу игу къегъэкIыж хамэ къэралхэм щыкIуэкIэ, «Шэшэным сыщыщщ» зэрыжиIэу, цIыхухэр къызэфIэувэурэ Iэгу къызэрыхуеуэр. «Кавказым щыщ цIыхухэр зэрыхьэщIэхуэфIымкIэ дыцIэрыIуэщ. Ди шхыныгъуэхэр ди тхыдэщ, ди хабзэщ, цIыхухэм дазэрыдекIуэкI «дипломатыбзэщ», - жеIэ Мовлатовэм. – Ерыскъым и фIыгъэкIэ цIыху дахэхэм сахуозэ, езыхэм я деж срагъэблагъэ, дызэкIэлъокIуэ. Куэдрэ къысхуохуэ сымыцIыхуххэхэр къызбгъэдыхьэурэ, сэ спщэфIа гуэр зэраIухуар къыщызжаIэж». 

 Хъэдижэт пщэфIэкIэ зезыгъэсэну хуейхэм я егъэджакIуэуи мэлажьэ. Кавказ Ищхъэрэм къакIуэ туристхэм зыщагъасэ дерсхэр ирегъэкIуэкI. Кавказ шхыныгъуэхэр нэхъ цIэрыIуэ щIын хуейщ, Хъадижэт зэрегупсысымкIэ. «Псоми «осетин дэлэн», «хачапури» жыпIэми, ялъэгъуащ, зэхахащ, мыдрей кавказ шхыныгъуэхэр яцIыхуркъым. Туристхэм дэлэн 40-50 къыздащтэурэ щыкIуэж щыIэщ, апхуэдизкIэ ди ерыскъыр ягу ирохьри». 

 Македонием, Хорватием, Албанием, Тунисым, Эмиратхэм, Сауд Хьэрыпым, Ливаным, Иорданием, Мароккэм, Алыджым… А къэрал псоми щыIащ Мовлатовэр, и IэщIагъэм къыздихь хъерым и фIыгъэкIэ. Дэнэ кIуэми, Кавказым ижь-ижьыж лъандэрэ щапщэфI шхыныгъуэхэр ярегъэлъагъу.