Ухуэныгъэхэр зэпыуркъым

«Къуажэхэм зегъэужьын» лъэпкъ пэхуэщIэм хиубыдэу Псыхъурей жылэм ЩэнхабзэмкIэ унэщIэ щаухуэ, сабий садыр зыхуей щыхуагъазэ.
Мы зэманым а тIуми зэгъусэу унэ кIуэцI лэжьыгъэхэм щыпэрыуващ. Абы къыдэкIуэу щIэкIэ яхъуэжынущ унащхьэр, ток кIапсэхэр, унэ лъэгухэр, унэр къызэрагъэплъ Iэмэпсымэхэр.
Къатхъэным и цIэр зезыхьэ уэрамым и гъуэгур зэрагъэпэщыжащ, иджыпсту  къэухьхэр ягъэув. жылэдэсхэм я лъэIукIэ къуажэм дэт къулыкъущIапIэхэм екIуалIэу лъэс лъагъуэщIэ яухуэнущ.
Бахъсэн къалэм  щаухуэ школыщIэ, Хэку зауэшхуэм хэкIуэдахэм я фэеплъ МафIэ мыужьыхым екIуалIэ лъэс зекIуапIэр зэIузэпэщ ящI, Лазо и цIэр зезыхьэ уэрамыр зэрагъэпэщыж.
Ухуэныгъэхэр Бахъсэн къалэм и унафэщIхэм я нэIэм щIэту, къыхуагъэува пIалъэм къыкIэрымыхуу кърахьэлIэ.
Бахъсэн къалэм и «Кооператор» хьэблэм автовокзалыщIэ къыщызэIуахащ. Къалэ унафэщIхэр иджыпсту хоплъэ цIыху къызэрырашэкI транспортхэм я лэжьэкIэм дяпэкIэ халъхьэну зэхъуэкIыныгъэхэм, вокзалым шынагъуэншагъэр къыщызэгъэпэщыным епха хабзэхэм.