Къэбэрдей-Балъкъэрым мыIэрысей жыгхэр къемэщIэкIыу пхужыIэнукъым, ауэ абы щхьэкIэ ди тыкуэнхэмрэ бэзэрхэмрэ уасэхэм нэхъ щыкIэрыхууи плъагъуркъым. ЗэрыгурыIуэгъуэщи, иджы хуэдэ зэманым нэхъыбэу бгъуэтынур нэгъуэщI щIыпIэхэм къраш пхъэщхьэмыщхьэ нэфIэуфIэхэрщ.
Сату щIапIэхэм ди къэралым къыщагъэкIа мыIэрысэхэм бжьыпэр щаубыдыжын зэрыхуейм ехьэлIа псалъэмакъхэр куэд щIауэ къокIуэкI, арщхьэкIэ иджыпсту Iуэхур къызыхуэтыншэу зэтеубла хъуауэ пхужыIэнукъым - зэман хуейщ.
Минводы къалэм иджыблагъэ щекIуэкIащ «Pro яблоко» фIэщыгъэцIэм щIэт дунейпсо гъэлъэгъуэныгъэ. Абы и къызэгъэпэщакIуэхэмрэ жыг гъэкIыным елэжь зэгухьэныгъэхэм я лIыкIуэхэмрэ зэрытепсэлъыхьамкIэ, Урысейр езым и мыIэрысэхэмкIэ къызэрызэгъэпэщар процент 40 къудейкIэщ. Ди пхъэщхьэмыщхьэгъэкIхэм а бжыгъэм хагъэхъуэнущи, нэгъуэщI къэралхэм къызэрырашыр зэран къахуохъу.
Зэхыхьэм ипкъ иту екIуэкIа выставкэм хэтахэм къыхалъхьащ, пхъэщхьэмыщхьэр ди къэралым къыщрихьэлIэж зэманым нэгъуэщI щIыпIэхэм кърашхэр гъэмэщIэн зэрыхуейр, сыту жыпIэмэ дэ диIэр къыдэлыжу тхурикъунущ. Къэхъум къэхъуращи, нэгъуэщI щIыпIэ кърашхэм сатуущIэхэм нэхъ фейдэ къыхах, ахэр къэзышэхэмрэ зыщэжхэмрэ якум дэтыр зыхуэдизри зыми ищIэркъым, апщIондэху уасэр доуей икIи апхуэдэ зэгъэкIуэкIыкIэм хилъафэр лъапсейуэ а мыIэрысэр къэзыщэху цIыху къызэрыгуэкIхэрщ.
Гъэлъэгъуэныгъэм апхуэдэу къыщыхалъхьащ гъэш къэзышхэм къэралыр субсидиехэмкIэ зэрадэIэпыкъум хуэдэу жыггъэкIхэми защIигъэкъуэн зэрыхуейр. Псалъэм папщIэ, шэ килограмм ящэху, къэрал е щIыналъэ субсидие покIуэ. Мыдрейхэми апхуэдэ гулъытэ ягъуэтамэ, мыIэрысэхэм я уасэр къехуэхынут, езыхэри зыкIи хилъэфэнутэкъым. Iуэхум къыхахымрэ трагъэкIуадэмрэ зэпэплъытмэ, процент 30-р лэжьакIуэхэм улахуэу ират, процент 30-р къуэдыуэ ят, апхуэдиз дыдэ щIыгъэпшэрхэмрэ къэкIыгъэхэм зэрелэжь хущхъуэгъуэхэмрэ ятокIуадэ - Iуэхур ипэкIэ зэрагъэкIуэтэн гъэтIылъыгъэ ящIыну Iэмал ягъуэтыркъым. Адрей къэралыгъуэхэм а IэнатIэр тэмэму щызэтеублащ. Iуэхур къыщрахьэжьакIэ хэкIыпIэ къызэрагъуэтынум шэч хэлъкъым.
