КъыхэжаныкIахэр зэдагъэлъапIэ

КъБР-м щыIэ МВД-м Къэрал автоинспекцэмкIэ и управленэм щекIуэкIащ 2023 гъэм и япэ мазихым я лэжьыгъэм кърикIуахэм теухуа зэIущIэ. Абы хэтащ республикэм Къэрал кIуэцI IуэхухэмкIэ и министерствэм и штабым и унафэщI, къэрал кIуэцI къулыкъум и полковник Егоровэ Наталье, Къэрал автоинспекцэм и ­къудамэхэм я унафэщIхэмрэ республикэм и районхэм я инспектор нэхъыщхьэхэмрэ.

 ЗэIущIэм Iуэху гуапэкIэ щIидзащ - лэжьыгъэм къыщыхэжаныкIахэм иратащ къэрал, ведомствэ дамыгъэхэр. Къэрал кIуэцI IуэхухэмкIэ министру КъБР-м щыIэ, полицэм и генерал-лейтенант Павлов Василий и унафэкIэ «За отличие в службе ГИБДД» бгъэхэIу дамыгъэм и 2-нэ нагъыщэр, щIыхь, фIыщIэ тхылъхэр иратащ IэнатIэм и лэжьакIуэ зыбжанэм.
Республикэм Къэрал автоинспекцэмкIэ и управленэм и унафэщIым и къалэнхэр пIалъэкIэ зыгъэзащIэ, полицэм и полковник Сухорученкэ Дмитрий 2023 гъэм и япэ мазихым я лэжьыгъэм кърикIуахэм щытепсэлъыхьым къыхигъэщащ гъуэгу-транспорт къэхъукъащIэхэм хэкIуадэхэм я бжыгъэр процент 50-кIэ ягъэмэщIэн зэрахузэфIэкIар, блэкIа илъэсым и апхуэдэ пIалъэм елъытауэ. Къыхигъэщащ рулым дэсхэр гъуэгум и къыхуэкIуэ лъэ­ныкъуэм зэрытехьэмрэ блэкIын папщIэ чэзум зэрыпэмыплъэмрэ шынагъуэ нэхъ къэзышэу къы­зэрынэжыр
- Илъэсыр къызэрихьэрэ едгъэкIуэкIащ республикэпсо профилактикэ рейд 33-рэ, цIыхухэм гъуэгу хабзэр ягъэзэщIэным къыщыхуеджэ акцэу 700-м щIигъу. Гъуэгу-плъыр къулыкъум и лэжьакIуэхэм фадэ ефауэ машинэр зезыгъакIуэ 1000-м щIигъум, абыхэм ящыщу 200-р етIуанэу, шофёр тхылъхэр зыIахауэ е ар зимыIэхэу минитIым щIигъум къуэды тралъхьащ, рулым ахэр дэтIысхьэну хуимыту. Административнэ хабзэхэр къызэ­рызэ­паудыр зытх Iэмэпсымэхэм къагъэлъэгъуахэр хэплъ­хьэжмэ, гъуэгум зэрыщызекIуэ хабзэхэм мин 600-м щIигъурэ ебэкъуащ ди цIыхухэр, - жиIащ Сухорученкэ Дмитрий. 
Апхуэдэуи къыхигъэщащ «Гъуэгум шынагъуэншэу щызекIуэн» къэрал, «ФIагъ зиIэ гъуэгу шынагъуэншэхэр» лъэпкъ проектхэр мы зэманым зэрыпхагъэкIыр икIи гъуэгу-транспорт къэхъукъащIэхэм зи гъащIэр ихьхэр гъэмэщIэным, балигъ мыхъуахэм я узыншагъэмрэ гъащIэмрэ хъумэным нэхъыбэу зэрытрагъащIэр. Абы и лъэныкъуэкIэ адэкIэ зэлэжьыпхъэхэри ягъэнэIуащ.