МелыIычхэм я жыг хадэм

Мы махуэхэм ди къэралым ягу къыщагъэкIыж Донбассым щекIуэкI къаугъэм хэкIуэда сабийхэр. Абы теухуа псалъэ КъБР-м и Iэтащхьэ КIуэкIуэ Казбек щыжиIащ Интернетым щиIэ напэкIуэцIым.

Iэтащхьэм зэрыжиIэмкIэ, илъэсибгъу ипэкIэ, 2014 гъэм и бадзэуэгъуэ мазэм, Горловкэ жылэм деж щекIуэкIа зэзауэм щыхэкIуэдауэ щытащ цIыху 22-рэ, сабии 4 яхэту.
- Ар украиныдзэм и зауэлIхэм Донецк ЦIыхубэ Республикэм и щIыналъэм ­щалэжьа щIэпхъаджагъэхэм ящыщ зыщ. 2014 гъэм къыщыщIэдзауэ нобэр ­къыздэсым а зэпэщIэувэныгъэм хэкIуэдащ гъунэгъу щIыналъэм щыщ сабий 228-рэ. Дэ зэи тщыгъупщэнукъым а насыпыншагъэр икIи яхуэдгъэгъунукъым ар зы­щIахэм.
Фэеплъ махуэр Донецк ЦIыхубэ Республикэм щагъэувауэ щытащ 2022 гъэм. ­Донецк къалэм щыIэ МелыIычхэм я жыг хадэм а сабийхэм я фэеплъ щагъэуващ. «Донбассым и сабийхэм, зауэм и сабийхэм» жиIэу зытет а фэеплъым къыхэIущIыкIащ зауэ гущIэгъуншэм хэкIуэда ныбжьыщIэхэм я цIэ-унэцIэхэр.
Лажьэншэу зи гъащIэр зауэм къызэпиуда сабийхэм я фэеплъ нэхухэр Донбассми, ди Къэбэрдей-Балъкъэрми, Урысей Федерацэми щыпсэу цIыхухэм я гум илъынщ. Абы теухуа пэкIу Налшыки щекIуэкIащ (сурэтым).