«ГъуэгуфI шынагъуэншэхэр» лъэпкъ проектым ипкъ иту, республикэм и еджапIэхэм уахуэзышэ автомобиль зекIуапIэхэр къызыхуэтыншэу зэрагъэпэщыж.
Апхуэдэу, республикэм и курыт школрэ колледжу 9-м екIуалIэ гъуэгухэм ящыщу 5-р зыхуей хуагъэзащ, адрейхэм щIэгъэхуэбжьауэ йолэжь.
Налшык къалэ и уэрамхэм ящыщу 3-р, псори зэхэту километри 5-м нэблагъэ зи кIыхьагъыр, мы зэманым иджырей мардэхэм къитIасэу зэрагъэпэщыж. Абыхэм ящыщу, Нэхущым и цIэр зезыхьэм - 6-нэ курыт еджапIэр, Руставели и цIэкIэ щыIэм - 12-нэ курыт школыр тетщ, Къалмыкъым и цIэкIэ щыIэм - Къэбэрдей-Балъкъэр Гуманитар-техникэ колледжыр къедзащ.
Гъуэгуухуэ Iуэхухэм хыхьэу, зи гугъу тщIа щIыпIэхэм шынагъуэншагъэр къызэзыгъэпэщ нагъыщэхэр щагъэув, лъэс зэпрыкIыпIэхэр щыхагъэбелджылыкI, автомобиль зекIуапIэм цIыхухэр къытезымыгъэхьэ IущIапIэхэр щагъэув.
Республикэм и адрей жылэхэми дэт курыт еджапIэхэм екIуалIэ гъуэгухэм лэжьыгъэ пыухыкIахэр щокIуэкI. Апхуэдэу, Шэрэдж районым хыхьэ Балъкъэр Ипщэ къуажэм дэт курыт школым убгъэдэзышэ автомобиль зекIуапIэр лъэныкъуитIымкIи зэрагъэпэщыж.
КъинэмыщIауэ, Тэрч щIыналъэм хиубыдэ Арыкъ жылэм пхрыкI гъуэгум щыщу километри 2,5-м асфальтыщIэ тралъхьащ, къедза Iэхэлъахэм лъэс лъагъуэщIэхэр щыпхашащ, къэзыгъэнэху уэздыгъэхэр и кIыхьагъкIэ щыпадзащ. Гъэ еджэгъуэщIэм ирихьэлIэу зи гугъу тщIа псори хьэзыр хъунущ.
Мыдрейуэ. Каменномост, Хьэбэз, Зэрэгъыж, Лэскэн ЕтIуанэ, Ерокъуэ, Щхьэлыкъуэ къуажэхэм я школакIуэхэр тыншу икIи шынагъуэншэу я уэрамхэм щызекIуэфынущ, псори зэхэту, километр 30 зи кIыхьагъ я гъуэгухэр къызыхуэтыншэу зыхуей зэрыщыхуагъэзам къыхэкIыу. КъимыдэкIэрэ, IэщIагъэлIхэм зи гугъу тщIа автомобиль, лъэс зекIуапIэхэм асфальтыщIэ тралъхьащ, гъуэгу бгъунж къедзахэр зэгъэкIуауэ къыпагъэхьащ, нагъыщэхэр здыхуэзапхъэм щагъэуващ.
КъризэщIэткъуэжу къыхэдгъэщынщи, республикэм и еджапIэхэмрэ спортымкIэ и IуэхущIапIэхэмрэ екIуалIэ гъуэгухэр, зэрыщытам ефIэкIыжу, зэрызэрагъэпэщыжым мыхьэнэшхуэ иIэщ, сабийхэмрэ балигъхэмрэ шынагъуэншэу зэрыщызекIуэным къыхэкIыу.