Ерыскъым и уасэр я нэIэ щIэту

                 Къэбэрдей-Балъкъэрым ПромышленностымкIэ, энергетикэмрэ сатумкIэ и министерствэм къызэритамкIэ, республикэм нобэкIэ иIэщ цIыхухэм нэхъыбэу мыхьэнэ зрат, япэ ирагъэщу зыщIэупщIэ, зыхуэныкъуэу къащэху ерыскъыпхъэрэ хьэпшыпу зрикъунум хуэдиз. Ауэ абыхэм я уасэхэр щхьэусыгъуэншэу драмыгъэкIуеиным, хуей щыхъухэм ахэр къэгъэувыIэным кIэлъыплъ, ныкъусаныгъэхэр къыщIэзыгъэщ гуп республикэм къыщызэрагъэпэщауэ мэлажьэ.

         А гупым хохьэ Къэбэрдей-Балъкъэрым ПромышленностымкIэ, энергетикэмрэ сатумкIэ и министерствэм, КъБР-м Экономикэ зыужьыныгъэмкIэ и министерствэм, Урысейм и ФАС-м и управленэу КъБР-м щыIэм, республикэм и Жылагъуэ палатэм, Урысейм и ФНС-м и къудамэу КъБР-м щыIэм, СтатистикэмкIэ щIыналъэ IэнатIэхэм я унафэщIхэр, КъБР-м и прокуратурэм и лIыкIуэхэр, нэгъуэщIхэри.

         ЛэжьакIуэ гупым тхьэмахуэ къэс къепщытэ ерыскъымрэ хьэпшыпхэмрэ я уасэхэм республикэм щагъуэта зэхъуэкIыныгъэхэр икIи абы ехьэлIа унафэхэр къащтэ.

         Иужьрей къэпщытэныгъэхэм къызэрагъэлъэгъуамкIэ, цIыхухэр нэхъыбэу зыхуэныкъуэ языныкъуэ ерыскъымрэ хьэпшыпхэмрэ, Iуэхутхьэбзэхэм я уасэм хэхъуащ. Абы щхьэусыгъуэ хуэхъуауэ къалъытар щIэупщIэ зиIэ ерыскъыр, хьэпшыпыр къыщыщIагъэкIамрэ гъэм и чэзумрэ зэрызэтемыхуэрщ. Нэхъ тэмэму жыпIэмэ, хадэхэкIхэр, пхъэщхьэмыщхьэхэр щIымахуэм нэхъ лъапIэ мэхъу, ахэр къэгъэкIыным, щIыпIэм къэшэным нэхъыбэ зэрытекIуадэм къыхэкIыу. Апхуэдэщ ерыскъыхэкIхэр къыщIэзыгъэкIам абыхэм яхуигъэува уасэмрэ ахэр къэзыщэхуауэ зыщэжым дыщIигъужамрэ зэрызэщхьэщыкIыр, долларым и уасэр дэкIуей-къыхыжу зэрыщытыр, ерыскъым е хьэпшыпым хэлъ пкъыгъуэхэр хамэ къэралхэм къипшыныр лъапIэ зэрыхъуар, нэгъуэщIхэри. Ауэ КИФЩI-м хыхьэ щIыналъэхэм щыщыIэ уасэхэмрэ дыдейхэмрэ куэдкIэ зэщхьэщыкIыркъым, зэхуэдэу щымытмэ.

         ЦIыхухэм ерыскъы и лъэныкъуэкIэ я шынагъуэншагъэр къызэгъэпэща хъун, ахэр зэпымыууэ къаIэрыхьэн папщIэ, лэжьакIуэ гупым республикэм гъэтIылъыгъэу иIэри тхьэмахуэ къэс къепщытэ.  КъБР-м ПромышленностымкIэ, энергетикэмрэ сатумкIэ и министерствэм и нэIэ щIигъэт зэпытщ хьэпшыпхэмрэ ерыскъымрэ къыщIэзыгъэкIхэмрэ сату щIапIэхэмрэ я зэпыщIэныгъэхэр, ахэр зэрызэдэлажьэ щIыкIэхэр. Республикэм щыпсэухэр япэу зыхуэныкъуэ хъу ерыскъыхэмкIэ, хьэпшыпхэмкIэ къызэгъэпэщыныр зыгуэркIэ зэблэуа хъумэ, абыкIэ Правительствэм хъыбар ирагъащIэ, щытыкIэм ехьэлIа унафэ къащтэн, Iуэхур ягъэзэкIуэжын папщIэ.

                                                        ХЬЭЩЫКЪУЕЙ Олег.