Iуэхум мы илъэсми пащэнущ

Илъэсих ипэкIэ фэтэр куэду зэхэт унэ зэтетхэм щахъуэжауэ щытащ счётчикхэр. Абы лъандэрэ, мардэ пыухыкIам тету, зы мазэм къагъэсэбэпа электрокъарум хуэза киловатт бжыгъэр къратхыкIри, унэр зи жьауэм щIэт ЖКХ-хэм, сервисхэм е «Электросеть» IуэхущIапIэм ирагъэхьу къокIуэкI. Уасэр сыт хуэдэ махуэм хуэзэу ятми мэхъу, пIалъэм фIрамыгъэш къудеймэ, ауэ а бжыгъэхэр и чэзум яIэрыхьэн хуейщ, ику иту мазэ къэс ягъэсыр зыхуэдизыр ящIэн папщIэ. Ар пIалъэ къыхуагъэувам фIимышу къратхыкIыныр куэдым къатехьэлъэ щыхъум, счётчикхэр фэтэрым къыщIахыу бжащхьэхэм хуэзэу трагъэувэмэ нэхъыфIу къалъытащ икIи апхуэдэу языныкъуэхэм ящIащ. Апхуэдэхэм деж фэтэрыр зейхэр хэмытыххэу езы IэщIагъэлIхэр кIуэурэ счётчикхэм къагъэлъэгъуар къратхыкI. Ар тыншщ махуэ псом унэм щIэмысхэмкIэ, зи закъуэу псэу лIыжь-фызыжьхэмкIэ. Иджы нэхъыфIыжыр къагупсысащ: фэтэр куэду зэхэт унэхэм щыпсэухэу зи счётчикхэр жьы хъуахэмрэ сэкъат зыгъуэтахэмрэ папщIэ электроприбор минитIым щIигъу ягъэувынущ. КъищынэмыщIауэ, электрокъарур зэгъэзэхуа хъун папщIэ республикэм щагъэзэщIэнущ къагъэсэбэпа токыр къызэрапщытэ IэмэпсымэщIэхэр гъэувыным теухуа программэ щхьэхуэри.

ПэхуэщIэм хиубыдэу «счётчик губзыгъэ» мин 37,3-рэ щагъэуващ Бахъсэн къалэм, Бахъсэн, Дзэлыкъуэ щIыналъэхэм хиубыдэ языныкъуэ къуажэхэм. Налшык щагъэувынущ Iэмэпсымэ мини 4,5-рэ. Фигу къэдгъэкIыжынщи, «счётчик губзыгъэхэр» гъэувыныр зытращIыхьар «Къэббалъкъэнерго» IуэхущIапIэм и Iуэхутхьэбзэр къэзыгъэсэбэпхэм я къалэныр ящыгъэпсынщIэнырщ. IэмэпсымэщIэхэм я фIыгъэкIэ счётчикхэм къагъэлъагъуэр къитхыкIын, ар яIэрыгъэхьэн, Iэмэпсымэхэм я щытыкIэм кIэлъыплъын хуэмейуэ, абы пыщIа псори дистанционнэу зэфIагъэкIынущ.

 «Россети Северный Кавказ» IуэхущIапIэм и «Къэббалъкъэнерго» къудамэм и IэщIагъэлIхэм 2023 гъэм и щIышылэм къыщыщIэдзауэ фокIадэм нэсыху цIыху мин 85,7-рэ электрокъарур пIалъэкIэ зыхуамыутIыпщынухэм хагъэхьат, щIыхуэшхуэхэр зэрателъым къыхэкIыу - сом меларди 2-м щIигъу яхузэтрихьащ. Абыхэм ящыщу мин 83-м щIигъум ятелъ щIыхуэхэр занщIэу зытрагъэкIащ, щетхьэкъуну пIалъэм нэмыс щIыкIэ. Компанием и щIыхуэу сом мелуан 20-м нэс зытезыгъэхуа цIыху мини 2-м я ток кIапсэхэр паупщIащ. Абыхэм электрокъарур щIэрыщIэу хуаутIыпщын папщIэ япшыныжын хуейр ятелъ щIыхуэм и закъуэкъым, атIэ ток кIапсэхэр къыпыхынымрэ пыдзэжынымрэ хуэзэ уасэри, хабзэм тету, щхьэхуэу ятын хуейщ. Физическэ лицохэм я деж абы щыхуозэ сом мини 3, юридическэ лицохэм я деж сом мини 10. Япэхэм щIыхуэр зытрагъэкIын папщIэ махуэ 30, етIуанэхэм махуи 10 пIалъэ ират. Абы къриубыдэу зытрамыгъэкIмэ, абыхэм электрокъарур яхуэутIыпщыныр зэпагъэунущ. Мы Iуэхум теухуауэ иджыпсту лэжьыгъэ пыухыкIахэр щрагъэкIуэкI ди республикэм и къалэхэмрэ жылэхэмрэ электрокъарумкIэ къызэзыгъэпэщ щIыналъэ компаниехэм.

Iуэхум къыдэкIуэу фигу къэдгъэкIыжынщи, «Къэббалъкъэнерго»-м и объектхэр сыт и лъэныкъуэкIи щIымахуэ лъэхъэнэм хуагъэхьэзыращ, цIыхухэри IуэхущIапIэхэри щIэгузэвэн щымыIэу. ЛэжьакIуэхэм жэщ-махуэ ямыIэу я къалэныр кърахьэлIэ унагъуэ къэс зэпымыууэ электрокъарур яIэрыгъэхьэным теухуауэ. Псом хуэмыдэу мы гъэм лэжьыгъэшхуэ щрагъэкIуэкIащ республикэм и бгылъэ щIыпIэхэм щыукъуэдия ток кIапсэхэр, электрокъарур щызэбгратыкI щIыпIэхэр къызыхуэтыншэу гъэ щIэкIын папщIэ. А щIыпIэхэм сэкъат зыгъуэта кIапсэхэр щахъуэжащ, уэсымрэ Iумылымрэ ахэр щыхъумэным ехьэлIа шынагъуэншагъэ мардэхэм я Iэмал псори къагъэсэбэп.