ГъэшхэкI продукцэм дамыгъэхэр трагъэувэ

2024 гъэм фокIадэм и 1-м щегъэжьауэ ди къэралым гъэшым щелэжь и мэкъумэш, уней IуэхущIапIэхэм, фермерхэм езыхэм я дамыгъэ яIэжын хуейщ. Апхуэдэ унафэ къищтащ Урысей Федерацэм и Правительствэм. А махуэм къыщыщIэдзауэ абыхэм къыщIагъэкI продукцэхэм код щхьэхуэхэр тратхэнущ, армырамэ, ахэр сату щIапIэхэм щрагъэщэнукъым.

КъБР-м Мэкъумэш хозяйствэмкIэ и министерствэм къызэрыджиIамкIэ, апхуэдэ кодхэр зи продукцэхэм тезыгъэувэн хуейхэм республикэм шэхэкIым щелэжь и IуэхущIапIитI хохуэ.

Дамыгъэ щхьэхуэхэр шэхэкIхэм щIытрагъэувэм и щхьэусыгъуэр ахэр къыщыщIагъэкIа IуэхущIапIэмрэ ящэну здрагъэшамрэ наIуэу щытын, гъэшхэкI нэпцIхэр абыхэм къахэмыхуэн щхьэкIэщ.

ЦIыхум къищэху шэхэкIыр къабзэрэ нэпцIрэ зэхигъэкIыфынущ, абы тет дамыгъэ щхьэхуэм сурэт трихрэ телефоным пыщIа «Дамыгъэ пэж»  интернет-гуэдзэнымкIэ еплъу абы теухуауэ ит хъыбархэм зыщигъэгъуазэмэ.

Зи гугъу тщIы унафэм лэжьэн щIидзэн хуейуэ щытащ 2023 гъэм  фокIадэм и 1-м щегъэжьауэ, ауэ шэхэкIым елэжь IуэхущIапIэхэм я продукцэм дамыгъэхэр зэрытрагъэувэн оборудованэхэр, техникэхэр зэрамыIэм, а Iуэхум зэрыхуэмыхьэзырым къыхэкIыу зи илъэскIэ ягъэIэпхъуащ.

«Дамыгъэ пэж» интернет-гуэдзэным и IэщIагъэлIхэм зэрыжаIэмкIэ, кодхэмрэ дамыгъэ хэхахэмрэ зэрытрагъэувэ техникэм, обрудованэм я уасэм и процент 50-р хукIэрагъэхунущ апхуэдэ лъэIу къэзыт IуэхущIапIэхэм.

                                               ХЬЭЩЫКЪУЕЙ Олег.