ЩIэныгъэхэмкIэ Дунейпсо Адыгэ Академием и щIэныгъэ журналым 2023 гъэм и 4-нэ къыдэкIыгъуэр дунейм къытехьащ. Абы итщ математикэмкIэ, биологиемкIэ, тхыдэмкIэ, философиемкIэ тхыгъэ купщIафIэу щIэныгъэлIхэм ягъэхьэзырахэр.
Журналым итщ ЩIДАА-р къызэзыгъэпэща, абы и япэ президенту щыта, совет, урысей щIэныгъэлI, физико-математикэ щIэныгъэхэмкIэ доктор, профессор Нэхущ Iэдэм къызэралъхурэ илъэс 85-рэ щрикъум ирихьэлIэу ЩIДАА-м и вице-президент ХьэфIыцIэ Мухьэмэд, академием и щIэныгъэ секретарь нэхъыщхьэ Щхьэгъэпсо Сэфарбий, физико-математикэ щIэныгъэхэмкIэ доктор, академик Псху Арсен, физико-математикэ щIэныгъэхэмкIэ доктор, академик Мамчуев Мурат, физико-математикэ щIэныгъэхэмкIэ кандидатхэу Аттаев Анатолийрэ Геккиевэ Сакинатрэ зэдагъэхьэзыра тхыгъэшхуэр.
Математикэм и пщIэр лъагэу зыIэта, адыгэм и щIэныгъэлI пажэм и махуэм ирихьэлIэу ЩIДАА-м математикэмрэ физикэмкIэ и къудамэм къепхахэри елIэлIащ журналым и зи чэзу къыдэкIыгъуэм - тхыгъэ купщIафIэу 7 ягъэхьэзыращ абыхэм. ЩIэныгъэхэмкIэ Урысей академием математикэмрэ автоматизацэмкIэ КъБР-м щиIэ институтымрэ Къэбэрдей-Балъкъэр къэрал университетымрэ я щIэныгъэлIхэу Багъэтыр ФатIимэ, Кыржын Рэмэзан, Лосэн ФатIимэ, КIэнэтI Раисэ, Мамчуев Мурат, Мэсей Олесэ, Хъубий Казбек, Энеевэ Лиа-нэ сымэ елэжьащ тхыгъэхэм.
Биологие щIэныгъэхэмкIэ доктор, КъБКъУ-м и профессор, ЩIДАА-м и щIэныгъэ секретарь нэхъыщхьэ Щхьэгъэпсо Сэфарбий, ЩIэныгъэхэмкIэ Урысей академием КъБР-м щиIэ Бгылъэ щIыуэпсымкIэ институтым геоботаникэмкIэ и лабораторэм и унафэщI, биологие щIэныгъэхэмкIэ кандидат Хьэнэ Залым, а институтым и лэжьакIуэхэу, биологие щIэныгъэхэмкIэ доктор Чадаевэ Викторие, лабораторэм и лэжьакIуэ нэхъыщIэ Маремкъул Алинэ, КъБР-м и Лъэпкъ музейм тхыдэмкIэ и унафэщI Белоцерковская Иринэ сымэ зэдагъэхьэзыращ тхыгъэ гъэщIэгъуэн. Ахэр тетхыхьащ Къэбэрдей-Балъкъэрым и Лъэпкъ музейм щахъумэ удз гъэгъуахэм.
Биологие къудамэм Щхьэгъэпсор щхьэхуэу щытопсэлъыхь экобиоморфологием и лъабжьэр зыгъэтIылъахэм ящыщ Зозулин Георгий. ЩIэныгъэлIым зэпкърех абы щIэныгъэ-егъэджэныгъэ лэжьыгъэу иригъэкIуэкIар, экобиоморфологиемрэ ботаникэ щIэныгъэхэмрэ зегъэужьыным хэлъхьэныгъэу хуищIар.
Гуманитар къэхутэныгъэхэмкIэ институтым и лэжьакIуэ, тхыдэ щIэныгъэхэмкIэ доктор Къэжэр Артур тотхыхь КъБКъУ-м и унафэщIу щыта Лъостэн Владимир и жылагъуэ-политикэ лэжьыгъэм: абы лъэпкъ егъэджэныгъэмрэ щIэныгъэмрэ зегъэужьыным хуищIар зыхуэдизыр ди пащхьэ кърелъхьэ.
«Къэбэрдей псалъэжьхэм я гъунапкъэхэр» фIэщыгъэр иIэу ЩIДАА-м и философие къудамэм игъэхьэзыращ тхыгъэ щIэщыгъуэ. Ар и IэдакъэщIэкIщ философие щIэныгъэхэмкIэ доктор, КъБКъУ-м и профессор Тхьэгъэпсо Хьэжысмел. Абы адыгэ псалъэжьхэмрэ урыс жыIэгъуэхэмрэ зрегъапщэ икIи наIуэ къещI адыгэ псалъэжьхэр урысыбзэкIэ щызэрадзэкIкIэ и мыхьэнэр зэрыкIуэдыр, адыгэбзэм и къулеягъыр хуиту къызэраIуэтэн жыIэгъуэхэр урысыбзэм зэрыхэмытыр.
ЩIэныгъэхэмкIэ Дунейпсо Адыгэ Академием и щIэныгъэ секретарь нэхъыщхьэ Щхьэгъэпсо Сэфарбий зыхэта, БотаникэмкIэ урысейпсо зэгухьэныгъэм и зэхуэсышхуэу Санкт-Петербург щекIуэкIам тотхыхь биологие щIэныгъэхэмкIэ кандидат Крапивинэ Еленэ. Фигу къэдгъэкIыжынщи, Урысейм и щIыналъэ 33-м, Абхъазым, Белоруссием, Къэзахъстаным, Болгарием щыщхэу БотаникэмкIэ урысейпсо зэгухьэныгъэм и XV зэхуэсым цIыхуи 116-рэ хэтащ. Къыхэгъэщыпхъэщ мы зэгухьэныгъэр Урысейм и жылагъуэ зэгухьэныгъэхэм я нэхъыжь дыдэхэм зэращыщыр, ботаникэмрэ экологиемкIэ къэралым и зэIущIэ нэхъыщхьэу къалъытэу зэрыщытыр. Мы иужьрей зэIущIэр теухуат ЩIэныгъэхэмкIэ Урысей академиер илъэси 300 зэрырикъум. ЩIэныгъэм и дунейм апхуэдиз пщIэрэ мыхьэнэрэ щызиIэ зэгухьэныгъэм и унафэщIым и къуэдзэу абы щыхахащ биологие щIэныгъэхэмкIэ доктор, профессор, ЩIДАА-м и щIэныгъэ секретарь нэхъыщхьэ Щхьэгъэпсо Сэфарбий.