Спорт

Дзюдо

Урысей Федерацэм дзюдомкIэ пашэныгъэр къыщыхьыным хуэунэтIа зэхьэзэхуэу иджыблагъэ Тулэ къалэм щекIуэкIар Къэбэрдей-Балъкъэрым и щIалэ Къуныжь Ролан хуэугъурлащ. Зэпеуэр зэрекIуэкIам теухуа хъыбар иджыблагъэ зэбгригъэхащ УФ-м ДзюдомкIэ и федерацэм и пресс-IуэхущIапIэм.

Урысей Федерацэм футболымкIэ и Премьер-лигэм и командэ нэхъ лъэщ дыдэхэм ящыщ Санкт-Петербург и «Зенит»-р иджыблагъэ щыхьэщIат Азербайджаным и «Нефтчи»-м деж. Зэныбжьэгъугъэ зэIущIэр, бжыгъэр 2:1-уэ, хэгъэрейхэм яхьащ абя щыгъуэ, пэжыр жыпIэмэ, дызэримыгугъауэ. Ауэ дапхуэдэу мыхъуами, футболым кIэлъымыплъхэми хэзыщIыкIхэми, мыхьэнэшхуэ зимыIэ къызэрыгуэкI джэгугъуэу къалъытэнкIэ хъунт мы зыр хэмылъатэмэ: хьэщIэхэм топитIри яхудэзыгъэкIар Урысей Федерацэм щыщ футболист Мырзэ Резуану щымытамэ.

 Налшык къалэм футболымкIэ и спорт еджапIэм и щIалэ ныбжьыщIищым иджыблагъэ зэгурыIуэныгъэхэр иращIылIащ Урысей Федерацэм и Премьер-лигэмрэ (РПЛ), Япэ лигэмрэ (ФНЛ) щыджэгу командэхэм ящыщхэм.

         Псалъэм къыдэкIуэу, Хэжь Астемыр хыхьащ Сочэ къалэ и «Сочи»  футбол командэм, Хьэшкул Астемыр «СКА-Хабаровск»-м (ФНЛ), Къардэн Заур Мэзкуу и «Локомотив»-м.

Къэбэрдей-Балъкъэрым СпортымкIэ и министерствэм и пресс-IуэхущIапIэм къызэритамкIэ, Кавказ Ищхъэрэм и щIыналъэхэм алыдж-урым бэнэкIэмкIэ пашэныгъэр къыщыхьыным хуэунэтIа зэхьэзэхуэ Дагъыстэным и Хасавюрт къалэм иджыблагъэ щекIуэкIащ. Абы щызэпеуащ спортсмени 130-рэ.

ГуащIэу икIи удэзыхьэхыу екIуэкIа зэпеуэм Къэбэрдей-Балъкъэрым и бэнакIуэхэм медалиплI къыхахащ. Килограмм 87-рэ хъухэм я деж щыбанэ Къып Амир дыщэ медаль къихьащ. ЕтIуанэ увыпIэм дэкIуеящ Чыл Казбекрэ (кг 82-рэ), Темырчы Темырланрэ (кг 63-рэ). Ещанэ хъуащ Хъуп Астемыр (кг 60).

Атлетикэ хьэлъэ

Зэрылъэщыр къагъэлъагъуэ

Мейкъуапэ къалэм и «Уэщтэн» спорт комплексым иджыблагъэ щекIуэкIащ Урысей Федерацэм атлетикэ хьэлъэмкIэ пашэныгъэр къыщыхьыным хуэунэтIауэ щIалэгъуалэм я зэхьэзэхуэ. Абы гупитIу гуэшауэ щызэпеуащ илъэс 15-18, 19-20 зи ныбжь спортсменхэр.

Черкесск къалэм иджыблагъэ щекIуэкIащ ныбжьыщIэхэм армэ Iэпщэрыбанэ спортымкIэ я щIыналъэ зэхьэзэхуэ. Ар Урысей Федерацэм и ЛIыхъужь Остроухов Евгений и фэеплъу щытащ.
Зэхьэзэхуэм хэтащ Осетие Ищхъэрэ – Аланием, Къэбэрдей-Балъкъэрым, Къэрэшей-Шэрджэсым, Ставрополь крайм я спортсмен ныбжьыщIи 120-рэ.

Дагъыстэным и Хасавюрт къалэм иджыблагъэ щекIуэкIащ бэнэкIэ хуитымкIэ дунейпсо зэхьэзэхуэ. Ар и фэеплъу щытащ Урысей Федерацэм спортымкIэ щIыхь зиIэ и бэнакIуэ цIэрыIуэ Умаханов Щамил.

Налшык къалэм иджыблагъэ щекIуэкIащ алыдж-урым бэнэкIэмкIэ зэхьэзэхуэ, Лобжанидзе Владимир и фэеплъу къызэрагъэпэщауэ. Абы щызэпеуащ илъэс 12 - 14 зи ныбжь бэнакIуэ цIыкIухэр.

Зэхьэзэхуэм хэтащ «Арена» спорт еджапIэм и гъэсэнхэр икIи хъарзынэу зыкъыщагъэлъэгъуащ. Псалъэм и хьэтыркIэ, Уэртэн Расимрэ (кг 52-рэ) ХъуэкIуэн Ильхамрэ (кг 57-рэ) дыщэ медалхэр къахьащ. Кумыщ Ислъам етIуанэ хъуащ (кг 57-рэ). ТIэхъу Идаррэ (кг 32-рэ) Бекъул Тамерланрэ (кг 41-рэ) – ещанэщ.

Къэбэрдей-Балъкъэрым СпортымкIэ и министерствэм къызэритамкIэ, Армавир къалэм Дзюдомрэ самбэмкIэ и комплексым урысейпсо зэхьэзэхуэ иджыблагъэ щекIуэкIащ. СамбэмкIэ зэпеуэр щытащ Урысей Федерацэм и ЛIыхъужь Трошев Геннадий и фэеплъу.