Я гуапагъэр зыхрагъащIэ

Сабийхэр хъумэным и дунейпсо махуэм ирихьэлIэу, «Хэкум и хъумакIуэхэр» IуэхущIапIэм и щIыналъэ къудамэм зэIущIэ гуапэ щызэхэтащ. Ар траухуащ дзэ Iуэху хэхам хэкIуэда лIыхъужьхэм я бынхэмрэ унагъуэхэмрэ гъэгушхуэным. Зэхыхьэм кърагъэблэгъат Къэбэрдей-Балъкъэрым и щIыналъэ псоми щыщхэр.

«Хэкум и хъумакIуэхэр» щIыналъэ фондым и унафэщI Дадэ МуIэед къызэрыджиIамкIэ, зэхы-       хьэр иджы етIуанэу къызэрагъэпэщ, лIыхъужьхэм я бынхэр зэхуашэсурэ ягъэджэгуу, къагъафэу, Iэ­фIы­кIэхэмрэ саугъэтхэмкIэ я гур къызэщIаIэтэу. «Мэ­къуауэгъуэм и 1-м псоми ягъэлъэпIэнущ Сабийхэр ­хъумэным и дунейпсо махуэр. Дэри абы теухуауэ          Iуэху гуапэ гуэр тщIэну дыхуейуэ нобэрей зэхуэсыр къызэдгъэпэщащ. ЗыкъытщIэзыгъэкъуа псоми фIы­щIэ яхуэсщIыну сыхуейт, псом хуэмыдэу мы Iуэхур къыхэзылъхьа, Сабийм и хуитыныгъэхэр хъумэнымкIэ уполномоченнэу КъБР-м щыIэ Бэдракъ Iэминэ, - жиIащ Дадэ МуIэед. - Илъэс етIуанэ хъуауэ, зэгъусэу зэхудошэс лIыгъэ зезыхьэу дзэ Iуэху хэхам хэкIуэдахэм я щIэблэр. Махуэр гукъинэжу, щIэщыгъуэу сабийхэм ­къазэрыхузэдгъэпэщыным дыхущIокъу: сурэтхэр ящI, таурыхъхэм хэт «лIыхъужьхэр» къахудогъэблагъэри, абыхэм ягъэджэгу. Мыр ауэ зэхыхьэ къудейкъым. ЩIэблэр хэкупсэу, къыщалъхуа я щIыналъэм хуэпэжу къэгъэхъуным ди зэманым мыхьэнэшхуэ иIэщ. Дэтхэнэми яжетIэну дыхуейщ зэрамызакъуэр, я Iуэхур зэрадэтIыгъынур, щIэгъэкъуэн сыт щыгъуи дазэрыхуэхъунур. Зи къалэныр лIыгъэ хэлъу зыгъэзащIэу хэкIуэдахэм я фэеплъым пщIэ хуэтщIыныр ди хьэкъщ. Ди хъуэпсапIэщ абыкIэ щыIэ ди щIалэхэр узыншэу къэ­кIуэжыну».
Дадэм дыщIигъуащ «Хэкум и хъумакIуэхэр» фондыр къызэрыунэхурэ мэкъуауэгъуэм и 1-м илъэ-               ситI зэрыхъури. А зэманым къриубыдэу лэ­жьыгъэш­хуэ зэрызэфIагъэкIам шэч хэлъкъым. ­«КъБР-м и ­Iэтащхьэр, щIыналъэ унафэщIхэр къыд­дэмыIэпы­къутэмэ, тлъэкIынур мащIэт. Абы къыхэкIыу псоми фIыщIэ яхузощI», - къыхигъэщащ Дадэ Му­Iэед. IуэхущIапIэм и унафэщIым жиIащ республи­кэм и къалэхэмрэ къуажэхэмрэ къимыкIыфахэм хуа­гъэхьэзыра тыгъэхэр щIыпIэхэм щылажьэ я IэщIагъэлIхэм зэрыхуахьыжынур.
Бэдракъ Iэминэ къыджиIащ: «Зэ­рытщIэщи, мэкъуауэгъуэм и 1-р сабийхэм я махуэшхуэщ. Ар мыхьэ­нэшхуэ зиIэз икIи гулъытэ хэха яхуэтщIын хуейщ къэралым и мамырыгъэр яхъумэу зи гъащIэр зытахэм я бынхэм. Нобэрей зэхуэсыр къы­щIызэдгъэпэщар щIэблэм защIэд­гъэкъуэну дызэрыхьэзырыр зыхедгъэщIэн, едгъэлъагъун пап­щIэщ. Абыхэм дазэрыкъуэтымрэ ди гуапагъэ ялъэдгъэIэсыну дызэрыхэтымрэ ящIэну дыхуейщ. «Хэкум и хъума­кIуэхэр» фондыр сыт и лэныкъуэкIи я щIэгъэкъуэнщ ди лIыхъужьхэм я бынхэмрэ унагъуэхэмрэ. Ди мурадщ мы гъэмахуэм иджыри нэгъуэщI Iуэху ­гуапэ куэд едгъэкIуэкIыну, хуэны­къуэхэм зырызыххэу защIэдгъэкъуэну».