Iуэхур нэхъ тынш мэхъу

Дызэрыт илъэсым фокIадэм и 23-м щегъэжьауэ УФ-м и щIыналъэ зыбжанэм, Къэбэрдей-Балъкъэрри яхэту, программэщIэ къыщыхалъхьащ ипотекэкIэ псэупIэхэр щIыным теухуауэ.

Программэр ягъэзэщIэнущ эскроу-счетыр къагъэсэбэпу е нэхъ гурыIуэгъуэу жыпIэмэ, псэупIэ зыухуэну е къэзыщэхуну цIыхум банкым счет щхьэхуэ къыщызэIуиха нэужь, ахъшэр абы егъакIуэ. Мыдрейуэ, ухуэныгъэр езыгъэкIуэкIыну IуэхущIапIэм зэгурыIуэныгъэм къыщыгъэлъэгъуа Iуэхуу хъуар и кIэм нимыгъэсауэ, унэр зыхуей хуэмызауэ, банкым ахъшэр абы иритынукъым, ныкъусаныгъэхэр щыIэ хъумэ, ахэри имыгъэзэкIуэжауэ.

Япэм ипотекэкIэ псэупIэ къэпщэхуным гугъуехь куэд пыщIауэ щытащ. Псалъэм и хьэтыркIэ, банкым ахъшэ къеIыпхын папщIэ, ухуэныгъэр зытетыну щIыр е езы унэ къебгъэжьар абы сакъылэту къыхуэбгъэнэн хуейт. Банкым и аккредитацэ имыIэу япэ къэс ухуакIуэри лэжьыгъэм пэрыувэфу щытакъым. Апхуэдэ лъэпощхьэпо куэдым Iууэрт цIыхухэр, сыту жыпIэмэ, банкым шэсыпIэу къыхуагъэнэн щIы яIэтэкъым нэхъыбэм.

Иджы Iуэхур нэхъ тынш хъуауэ жаIэ хэзыщIыкIхэм: щIым и пIэкIэ банкым фэтэр къыхуэбгъанэ хъунущ, ухуэныгъэ езыгъэкIуэкIыну IуэхущIапIэри аккредитацэншэу лажьэми ядэнущ.