ЗыгъэпсэхупIэ зэпэщхэр

«ПсэупIэмрэ къалэ щыIэкIэмрэ» лъэпкъ пэхуэщIэм хыхьэ «Къалэдэсхэм я тыншыпIэр къызэгъэпэщын» къэрал программэм и фIыгъэкIэ КъБР-м и Лэскэн щIыналъэм и Анзорей, Аргудан къуажэхэм цIыхухэр куэду щызэхэс я щIыпIэхэр дызэрыт илъэсым къриубыдэу зэIузэпэщ ящIын къалэнхэр зэхуагъэувыжати, нобэ абыхэм йоужьэрэкI.

Анзорей къуажэ администрацэм къедза щIыпIэр зэIузэпэщ ящIащ – жыг хадэ цIыкIу щагъэтIысащ, лъэс лъагъуэхэр иIэу.

Аргудан къуажэм цIыхухэр куэду щызэхуэс хъу зыгъэпсэхупIэщIэ мы махуэхэм жыджэру щаухуэ. Абы хэтщ спорт утыку Iэхуитлъэхуитхэр, сабий джэгупIэхэр, турникхэмрэ нэгъуэщI Iэмэпсымэхэмрэ.

Къуажэм и «Бедик» стадионым пэгъунэгъуу щаухуэ а щIыпIэм метр зэбгъузэнатIэ мини 8,5-рэ ирагъэубыдащ икIи ар зэIузэпэщ ящIа нэужь, сабийхэми, щIалэгъуалэми, нэхъыжьыфIхэми зыщагъэпсэхуфынущ щхьэж зэрыфIэфIым хуэдэу, абы щхьэкIи, зыхуей-зыхуэфIхэмкIэ къызэгъэпэщауэ ар щытынущ.

Лэжьыгъэхэр щекIуэкI щIыпIэм лъэс лъагъуэхэм плиткэхэр иралъхьащ, мывэхэмкIэ кърагъэбыдэкIыжащ, цIыхухэм я шынагъуэншагъэр къызэрагъэпэщу, IэрыщI «алэрыбгъу» щабэхэр спорт утыкухэм ираубгъуащ, тетIысхьэпIэхэмрэ кIэрыхубжьэрыху идзыпIэхэмрэ щагъэуващ, иджырей уэздыгъэхэр щыпадзащ. Сабий джэгупIэр обрудованэхэмрэ IэмэпсымэхэмкIэ иджыпсту къызэрагъэпэщ.

Лэжьыгъэхэр зэрызэфIэкIыу Аргудан и къуажэдэсхэм зыгъэпсэхупIэ зэпэщ яIэ хъунущ.