И фIагъым щыхьэт техъуэу

Шэджэм районым щыIэ «Шэджэм Агро» хуабэщ комплексым мы гъэм етIуанэу къратащ «Роскачество-Органик»-м и сертификатыр. Ар и щыхьэтщ абы къыщагъэкI бэдрэжаным фIагъ лъагэ зэриIэм, «Зеленый эталон» мардэм зэрыхуэкIуэм.

Мэкъумэш IуэхущIапIэм и хуабэщым къыщагъэкI продукцэм япэ сертификатыр къыхуагъэфэщауэ щытащ 2024 гъэм, абы ехьэлIауэ къэралым щыIэ хабзэхэмрэ ГОСТ-м къыщыгъэлъэгъуа мардэхэмрэ зэрахуэкIуэр къалъытэу.

«IуэхущIапIэм ирата сертификатыр щыхьэт тохъуэ абы и продукцэр IыхьитIу зэхэт къэпщытэныгъэхэм зэрыпхыкIам, мардэхэм къызэритIасэм, фIагъ лъагэ зэриIэм, цIыхум и узыншагъэмкIи шынагъуэ къызэрыбгъэдэмыкIым. Иджы, а псом иужькIэ, «Зеленый эталон» къэрал дамыгъэр и продукцэм тригъэувэ хъунущ абы», - щыжаIащ «Роскачество»-м. Апхуэдэуи сертификатым къыщыгъэлъэгъуащ продукцэр къызэрагъэкI, зэрахъумэ, зэрагъэIэпхъуэ, зэращэ щIыкIэм ехьэлIа мардэхэр.

«Шэджэм Агро» хуабэщыр хабжэ Кавказ Ищхъэрэм хадэхэкIхэр къыщызыгъэхъу IуэхущIапIэ нэхъ инхэм икIи ди къэралым щынэхъ лъэщхэм ящыщщ - «ЭКО-культура» мэкъумэш-промышленнэ холдингми хэтщ.

ХадэхэкIхэр къыщагъэкI хуабэщ комплексхэр ухуэныр пэхуэщIэ ехьэжьахэм хохьэ, Къэбэрдей-Балъкъэрым и мэкъумэш IэнатIэм фейдэ къезыт и унэтIыныгъэхэми ящыщщ.

«Шэджэм Агро»-м лэжьэн щригъэжьар 2023 гъэрщ икIи щIыуэ гектар 37,6-рэ иджыпсту абы иIыгъщ, бэдрэжану тонни 100-м нэблагъэ зы махуэм къыщыщIач. А псом нэмыщI, продукцэр щызэхадз центр иIэщ, тонн 600 зэуэ зыщIэхуэ хъумапIэ и гъусэу. Бэдрэжаныр хурагъашэ къэралым и щIыналъэ куэдым я сату щIыпIэ инхэм.