Зэрыгушхуэн я мащIэкъым

Кавказ Ищхъэрэм и туризмэмрэ экономикэмрэ зегъэужьыным ехьэлIауэ 2025 гъэм Кавказ.РФ-м иригъэкIуэкIа лэжьыгъэхэм къарикIуахэм щыхэплъэжащ иджырей зэIущIэм. Псалъэм къыдэкIуэу, КИФЩI-м и щIыналъэхэм курортыщIэхэр щыухуэнымрэ щыIэхэр егъэфIэкIуэнымрэ хуэунэтIа пэхуэщIэхэм сом мелард 83-м щIигъу трагъэкIуэдащ, апхуэдэуи иджырей технологиехэмрэ IэщIагъэлI Iэзэхэмрэ я лэжьыгъэм къыхашащ.

Абыхэм хыхьэу «Iуащхьэмахуэ» бгы-лыжэ курортым къыщызэIуахащ лыжэкIэ къыщажыхь щIыпIэрэ, псори зэхэту километри 5,2-рэ и кIыхьагъыу, метр 3500-рэ лъагапIэм удэзышей кIапсэ гъуэгуитIрэ. Апхуэдэуи, гъуэгухэр жэщкIэ къагъэнэхуу, уэздыгъэхэр ирикIуэу щыпадзащ, уэс IэрыщI зыщI системэм и етIуанэ Iыхьэр яухуащ.

2026 гъэм зэлэжьыну пэхуэщIэхэри зэIущIэм щагъэбелджылащ. Уеблэмэ 2025 гъэм Азау хуейм щыщIадзащ иджырей сервис центрыр ухуэн. Абы нэмыщI, лыжэкIэ джабэ нэкIухэм къыщыбжыхьын гъуэгущIэхэр щаукъуэдиинущ, цIыху бжыгъэ зэтрихьэхэр абыхэмкIэ ягъэмэщIэн мурадкIэ.

«Кавказ.РФ-м лэжьэн зэрыщIидзэрэ инвестицэ ахъшэу сом мелард 83-м щIигъу КИФЩI-м и щIыналъэхэм къыхригъэлъхьащ. 2025 гъэм ди унэтIыныгъэ нэхъыщхьэхэм хыхьащ турист IэнатIэм щылажьэхэм я щIэныгъэм хэгъэхъуэныр, IэщIагъэлI нэсхэр абы къешэлIэныр, иджырей технологиехэр жыджэру къэгъэсэбэпыныр», - жиIащ Кавказ.РФ-м и унафэщI Юмшанов Андрей.