Къэбэрдей-Балъкъэрым и Iэтащхьэ КIуэкIуэ Казбек видеозэпыщIэныгъэ Iэмалхэр къигъэсэбэпу хэтащ Наркотикым пэщIэтынымкIэ къэрал комитетым и зэIущIэм. Ар иригъэкIуэкIащ УФ-м и къэрал кIуэцI IуэхухэмкIэ министр, полицэм и генерал Колокольцев Владимир.
ЗэIущIэм щытепсэлъыхьащ наркотикымрэ абы и лIэужьыгъуэу щхьэр зыгъэутхъуэхэмрэ хабзэм къемызэгъыу зыщэ-къэзыщэхухэм я Iуэхур къызэпыудынымкIэ екIуэкI лэжьыгъэм кърикIуахэм. Министрым и псалъэхэм къызэрыхэщамкIэ, щIышылэ - жэпуэгъуэ мазэхэм къриубыдэу хабзэхъумэхэм къыщIагъэщащ а Iуэху мыщхьэпэмкIэ ящIэ сатум сом мелуан 400 къызэрыпэкIуар.
Къызэхуэсахэр тепсэлъыхьащ хабзэм къемызэгъыу зэрагъэкIуэкI наркотикым къит хэхъуэм пыщIа Iуэхухэми зэрызихъуэжам, банкыр хэмыту бжыгъэ активхэмрэ криптовалютэ операцэхэмрэ къызэрагъэсэбэпым. Мы Iуэхум пэщIэтынымкIэ сэбэп хъунущ 259-нэ федеральнэ законыр. «ДяпэкIэ уголовнэ законодательствэм зэхъуэкIыныгъэхэр хэлъхьэн хуейщ наркотикым къыпэкIуэ фейдэуэ бжыгъэ актив ящIахэр къэтхьэкъуным теухуауэ», - къыхигъэщащ Колокольцевым.
Нэхъыщхьэу къыхагъэщахэм ящыщщ наркологие IэнатIэм и лэжьыгъэр егъэфIэкIуэныр. Медицинэ IуэхущIапIэхэр лабораторэ IэмэпсымэхэмкIэ къызэрызэрагъэпэщыпхъэр жаIащ, химико-токсикологие къэхутэныгъэхэр щрагъэкIуэкIын щIыналъэ референс-центрхэр къызэIухын зэрыхуейри къыхагъэщащ.
Комитетым хэтхэм гулъытэ хэха хуащIащ къыдэкIуэтей щIэблэр наркотикым демыгъэхьэхыным нэхъ набдзэгубдзаплъэу кIэлъыплъын зэрыхуейм. «ЩIыналъэ псоми я къалэн нэхъыщхьэр ныбжьыщIэхэм я узыншагъэр наркотикым щыхъумэнырщ», - жиIащ министрым.
- Псоми фIыуэ къыдгурыIуэн хуейщ, хабзэм къемызэгъыу наркотикыр зэрагъэкIуэкIыу сыт хуэдиз щIэпхъаджагъэ къыщIэдгъэщми, зэрымащIэр. ЩIалэгъуалэм наркоманием хуиIэ щытыкIэм зегъэхъуэжын, абы зэребэнын гупсысэ яхэлъхьэн хуейщ, - дыщIигъуащ Колокольцевым.
Къэбэрдей-Балъкъэрым зи ныбжьыр балигъыпIэ нэмысахэм щадэлажьэ центри 156-рэ итщ, щIалэгъуалэ зэгухьэныгъэу - 8, волонтёр зэщIэхъееныгъэу - 9, фейдэ къегъэщIыным пымыщIа организацэу - 1 (Волонтёр Iуэхум зегъэужьынымкIэ ресурс центр), абы и къудамэу 12 щолажьэ. Апхуэдэуи ди хэгъэгум наркотикым пэщIэтынымкIэ, ар зэрамыхьэнымкIэ щIыналъэ программэхэр щыIэщ.
КъБР-м Наркотикым пэщIэтынымкIэ и комиссэм и зэIущIэу дыгъэгъазэм и 1-м екIуэкIам КIуэкIуэ Казбек ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ министерствэмрэ Граждан жылагъуэ IуэхущIапIэхэм ядэлэжьэнымрэ лъэпкъ IуэхухэмкIэ министерствэмрэ къалэн ящищIащ наркотикым пэщIэтыным теухуа лэжьыгъэ егъэкIуэкIыным щIалэгъуалэ нэхъыбэ къыхашэну.