ХэкIыпIэхэр къалъыхъуэ

Къэбэрдей-Балъкъэрым и Ректорхэм я зэгухьэныгъэм и УнафэщI, КIуэкIуэ Валерэ и цIэр зезыхьэ Къэбэрдей-Балъкъэр къэрал мэкъумэш университетым и ректор Апажэ Аслъэн иджыблагъэ хэтащ Урысейм и Ректорхэм я зэгухьэныгъэм и зэIущIэшхуэм. Мэзкуу дэт, Ломоносов Михаил и цIэр зезыхьэ Къэрал университетым и ЩIэныгъэ библиотекэм щызэхэта зэхуэсым лъэпкъ щIэныгъэмрэ егъэджэныгъэмрэ ехьэлIа Iуэхугъуэ куэдым щытепсэлъыхьащ.

Зэхуэсыр иригъэкIуэкIащ Ломоносов Михаил и цIэр зезыхьэ Къэрал университетым и ректор, академик Садовничий Виктор. Апхуэдэу зэIущIэшхуэм кърихьэлIащ УФ-м щIэныгъэмрэ щIэныгъэ нэхъыщхьэмкIэ и министр Фальков Николай, Урысейм ЩIэныгъэхэмкIэ академием и унафэщI Сергеев Михаил, УФ-м и Къэрал Думэм щIэныгъэмрэ щIэныгъэ нэхъыщхьэмкIэ и къудамэм и унафэщI Кабышев Сергей, къэралым ит еджапIэ нэхъыщхьэхэм я лIыкIуэхэр.
ЗэIущIэр къыщызэIуихым, Садовничий Виктор къыхигъэщащ хэгъэгу еджапIэ нэхъыщхьэхэм щекIуэкI егъэджэныгъэ Iуэхугъуэхэм зэрызахъуэжыр, дунейм щыщыIэ щытыкIэм ижь къазэрыщIихур, гъащIэм къигъэув зэхъуэкIыныгъэхэм Iэмалрэ гъуэгурэ къахуэгъуэтын зэрыхуейр. Академикым и гугъу ищIащ къыкъуэкIынкIэ хъуну лъэпощхьэпохэм еджапIэ нэхъыщхьэхэр блэкIын икIи щытыкIэ гугъум имыхуэн папщIэ, ялъэкIахэмрэ яхузэфIэкIынухэмрэ зэпалъытэжын, унафэ пыухыкIахэм къыхуэкIуэн зэрыхуейм. Апхуэдэу Садовничий Виктор тепсэлъыхьащ тIууэ зэщхьэщыха егъэджэныгъэм кърикIуахэм, щIэныгъэр и лъабжьэу егъэджэныгъэр зэтеублэн зэрыхуейм. Абы къызэрилъытэмкIэ, щIэныгъэ нэхъыщхьэм и фIагъыр къыщупщытэкIэ Iэмал имыIэу къэлъытн хуейщ ар къэралым и технологие щытыкIэм зэрыхуэкIуэм. «Зыщыгъэгъупщэн хуейкъым щIэныгърэи егъэджэныгъэри жылагъуэ-экономикэ псэукIэм и зыужьыныгъэм, къэралым и шынагъуэншагъэр къызэгъэпэщыным хэкIыпIэ зэрахуэхъур», – жиIащ Садовничий Виктор.
Абы къищынэмыщIауэ, академикым тригъэчыныхьащ еджапIэ нэхъыщхьэхэм IэщIагъэрэ щIэныгъэрэ зэрырат программэхэр щызэхалъхьэкIэ, Iэмалыншэу совет икIи урысейпсо егъэджэкIэ Iэмал пэрытхэр къэгъэсэбэпын зэрыхуейр, дунейпсо щIэныгъэ мардэхэр къыхалъытэми, япэ ита щIэныгъэлIхэм я лэжьыгъэхэр IэщIыб пщIы зэрымыхъунур.
«Ди къэралым ит еджапIэ нэхъыщхьэхэм я лэжьыгъэм щIэныгъэм и унэтIыныгъэ зэмылIэужьыгъуэхэм къытехъеикI къэхутэныгъэхэр лъабжьэ хуэщIыпхъэщ. ЩIэныгъэр зыбгъэдалъхьэ ныбжьыщIэхэм къыхаха IэщIагъэм и щэхухэм щыгъуазэ зыхуащI, есэныгъэхэр зэрагъэгъуэт къудейм къыщымыувыIэу, абы и жыпхъэм икIыфу, къегъэщIылIа IэнатIэхэм хэщIыкI хуаIэу, егъэджэныгъэмрэ IэщIагъэмкIэ яIэ хъуа зэхэщIыкIыр лантIэу зэрахьэу гъэсэн хуейщ», – жиIащ академикым. Абы и Iэмалу щытынум и гугъу щищIым, Садовничий Виктор къыхилъхьащ специалитетым епха программэхэм зрагъэубгъуну, псом хуэмыдэу экономикэмрэ жылагъуэ-къэралыгъуэ мыхьэнэ зиIэ IэнатIэхэмрэ ар нэхъыбэ щащIыну. Садовничэм зэрыжиIэмкIэ, магистратурэр зэрылажьэ программэхэр щIэныгъэм епха IэнатIэхэм япыщIауэ, тIууэ зэщхьэщыха егъэджэныгъэр (бакалавриат + магистратурэ) еджэныгъэм и къудамэ щхьэхуэхэмрэ хамэ къэрал къикIа студентхэмрэ щхьэкIэ гъэпсауэ щытмэ, щыIэ хъуа гъэпсыкIэм удынышхуэ хуэмыхъуу зригъэхъуэжынт. ЩIэныгъэлIым зэрытригъэчыныхьымкIэ, еджэныгъэм хэлъыну бгъэдыхьэкIищми языхэзыр къэзыуххэм аспирантурэм щыпащэну Iэмал яIэн хуейщ.
Ломоносов Михаил и цIэр зезыхьэ къэрал университетым и ректорым къыхуриджащ зэхуэсым къыщаIэта Iуэхугъуэхэр щхьэж и еджапIэм и ЩIэныгъэ советхэм щызэпкърахыну, иджырей дунейм щыщыIэ щытыкIэм пэджэжу, ауэ лъэхъэнэ кIыхькIэ лэжьэну егъэджэкIэ Iэмалхэм егупсысыну, еджапIэ нэхъыщхьэхэм я зыужьыкIэ икIи зэрызихъуэж хъуну щIыкIэхэм я Iэмалхэр зэпалъытыну, абы къищынэмыщIауэ, къызыхуэкIуа гупсысэхэр, еплъыкIэхэр, бгъэдыхьэкIэхэр Урысейм и Ректорхэм я зэгухьэныгъэм и чэзу зэIущIэм къыщыхалъхьэну.
Апхуэдэу зэхуэсым къыщаIэта Iуэхугъуэхэм зэреплъ, къазэрыщыхъу, зэрыбгъэдыхьэ щIыкIэр жаIащ УФ-м щIэныгъэмрэ щIэныгъэ нэхъыщхьэмкIэ и министр Фальков Николайрэ Урысейм ЩIэныгъэхэмкIэ и академием и унафэщI Сергеев Михаилрэ.
 

 

ЩХЬЭЩЭХУЖ Инал.
Поделиться: