Плутон и щэхухэр

ПIалъэ кIыхькIэ Плутоныр ялъытащ ебгъуанэ планетэу. 1930 гъэм ар къызэIузыха американ Томбо Клайд игугъащ ар дыгъэм нэхъ пэжыжьэ иужьрей дыдэ планетэу. Ар псом нэхърэ нэхъ цIыкIут. Томбо абы фIищащ тхьэм и цIэ. XXI - нэ лIэщIыгъуэм и пэщIэдзэм астрономхэм шэч къытрахьэ хъуащ: Плутоныр планетэу плъытэ хъуну пIэрэ, жаIэри. Зы лъэныкъуэкIэ, абы иIэт планетэм и хабзэхэр: хъурейт, дыгъэм и хъуреягъыр къикIухьырт, езым нэхърэ нэхъ ин нэгъуэщI планетэм и спутниктэкъым. Ауэ нэгъуэщI лъэныкъуэкIэ: планетэхэм я хабзэ еплIанэр къыхуэтт - и орбитэм пэгъунэгъуу щIыпIэ нэщI иIэтэкъым. Къэхутэныгъэхэр ирагъэкIуэкIыурэ, наIуэ хъуащ, Плутоным и орбитэр нэгъуэщI объектхэм къызэраухъуреихьар. Астрономхэм ахэр зэуIуу къабжри, американ астроном Койпер Джерардэ и цIэр фIащауэ, Койпер и пояскIэ йоджэ. 2006 гъэм дунейпсо астроном союзым зэIущIэ ирагъэкIуэкIри, Плутоным «планетэ» цIэр къыIэщIахащ. Ауэ, планетэм и хабзищыр зэриIэр къалъытэри, «планетэжьей» фIащащ. 
2015 гъэм и бадзэуэгъуэм «Новые горизонты» планетэзэхуаку станцыр Плутоным гъунэгъуу бгъэдыхьэфащ. Плутон планетэжьейр хуэдитхукIэ ЩIым нэхърэ нэхъ цIыкIущ, хуэдэ 500-кIи нэхъ псынщIэщ. Дыгъэм и нэхур ЩIым дакъикъи 8,5-кIэ къэсмэ, Плутоным ар сыхьэти 4-рэ ныкъуэкIэ нэсу аращ. Плутоным укъиплъыкIмэ, Дыгъэр зэрыплъагъунур вагъуэ теплъэ иIэущ. Планетэжьейм градус -230 - рэ хуэдиз щIыIагъ иIыгъщ. Астрономхэм къызэрахутамкIэ, Плутоным атмосферэ щыIэщ. ЩIым и атмосферэм хуэдэу, абыи азот куэду хэтщ. Ауэ абы ущыбэуэфынкIэ Iэмал иIэкъым. Кислородым ипIэкIэ атмосферэм хэтщ шэдгъуэз (метан), углекислэ газым и пIэкIэ – углеродым и монооксид. Плутоным щыIэ атмосферэр щхъуафэщ, тIощIу зэтопщIыкI (слой). Дэтхэнэ зэтепщIыкIми езым и температурэ иIыгъыжщ. Нэхъ хуабэ дыдэм градус - I50-рэ щIыIагъыу иIэщ. Къыхэгъэщыпхъэщ: градус -210-м деж азотыр мэщт, -183-м деж - метаныр. 
2015 гъэм «Новые горизонты» станцэм Плутоным сурэт трихащ. Планетэжьейм и щIыфэр быркъуэшыркъуэщ. Газхэр зэрыщтыхьа нэпкъхэмрэ бгыхэмрэ, мылылъэ къумхэр щыболъагъу. Къумхэм ящыщ зым цIыхум и гум и теплъэм ещхь иIэщ. Абы Томбо и щIыпIэ (область) фIащащ. Ауэ цIыхухэр йоджэ Плутоным игукIи («сердце Плутона»). Плутоным и гум и сэмэгурабгъу Iыхьэр нэхъ инщ. Сэмэгурабгъу лъэныкъуэм иIэщ азот быдэ (твёрдый азот) зэрыз тафи, бгыхэри. Бгыхэм ящыщ зым, Норгея зыфIащам, и лъагагъщ метр 3500-рэ. Плутоным и зэщIэщтыхьа бгыхэр дэнэ къикIа? «Хуэбгъэфащэ хъунущ зэгуэр ар пщтыру щытауэ», - жызыIэхэр щыIэщ. Ауэ «Новые горизонты» станцым къызэрихутамкIэ, бгыхэр щIэщ. ЩIэныгъэлIхэм хуагъэфащэ Плутон псы куэду щыгъэпщкIуауэ. Градуси 2 - 4 мынэхъ щIыIэ псыр зэм-зэмкIэ планетэжьейм и щхьэфэм къыдрикIейрэ градус – 230 щIыIагъым жьэхэуэу хуагъэфащэ. Абы щыгъуэм псыр лавэ хуэдэу мэхъу. 

 

 

Зыгъэхьэзырар Гугъуэт Заремэщ.
Поделиться: